Libieralna-demakratyčnaja partyja (ŁDP) adkryła svoj pieradvybarny štab dla ŭdziełu ŭ vybarach prezidenta Biełarusi.
Prezidenckija vybary pavinny prajści nie paźniej za 20 listapada hetaha hoda. Najbolš vierahodnaj dataj ich praviadzieńnia nazyvałasia 15 listapada.
ŁDP — pieršaja palityčnaja partyja, jakaja zajaviła ab stvareńni pieradvybarnaha štaba. Sa svaim kandydatam u prezidenty jana vyznačyłasia jašče ŭ krasaviku 2013 hoda na pazačarhovym źjedzie, im staŭ staršynia partyja Siarhiej Hajdukievič.
Pieradvybarny štab ŁDP adkryty pa adrasie: vulica Arłoŭskaja, 40. Paśla aficyjnaha abjaŭleńnia ab pačatku prezidenckaj kampanii jon budzie pracavać kruhłasutačna. Užo ciapier jaho moža naviedać luby, paviedamiŭ kiraŭnik štaba, pieršy namieśnik staršyni ŁDP Aleh Hajdukievič. «Ja abo dziažurny budziem hatovy adkazać na ŭsie pytańni, a taksama vysłuchać prapanovy. Akramia taho, my hatovy pradastavić svoj ofis dla praviadzieńnia roznych mierapryjemstvaŭ, jakija chočuć arhanizavać lubyja arhanizacyi», — skazaŭ jon.
Treba adznačyć, što Siarhiej Hajdukievič udzielničaŭ u prezidenckich kampanijach 2001, 2006 i 2010 hadoŭ. U 2001 hodzie za jaho, pavodle aficyjnych źviestak, prahałasavała 2,48%, u 2006-m — 3,5%. U 2010 hodzie ŁDP zajaviła ab zbory nieabchodnych dla vyłučeńnia kandydata ŭ prezidenty 100 tysiačach podpisaŭ, adnak admoviłasia ad udziełu ŭ vybarach. Hajdukievič rastłumačyŭ heta tym, što «vybary ŭ Biełarusi — heta śpiektakl, vyniki jakoha ŭžo daŭno ŭsim viadomyja».
Ab svaim namiery ŭdzielničać u prezidenckich vybarach zajaŭlaŭ taksama lidar Abjadnanaj hramadzianskaj partyi Anatol Labiedźka.
Ułasnaha kandydata płanuje vyłučyć i kampanija «Narodny refierendum», u jakuju ŭvachodziać Partyja BNF, Biełaruskaja sacyjał-demakratyčnaja partyja (Hramada), ruch «Za Svabodu» i kampanija «Havary praŭdu».
Partyja BNF 7 sakavika pryniała rašeńnie prapanavać vyłučyć kandydatam u prezidenty ad kampanii «Narodny refierendum» namieśnika staršyni svajoj partyi Ryhora Kastusiova, jaki ŭdzielničaŭ u prezidenckaj kampanii 2010 hoda.
