Dla vyjaŭleńnia samahonnych aparataŭ u ciažkadastupnych miescach Nalibockaj puščy 15 sakavika supracoŭniki ŭpraŭleńnia achovy pravaparadku i prafiłaktyki i AMAP UUS Minabłvykankama spłavilisia pa Isłačy, jakaja ciače pa terytoryi dziaržaŭnaha łandšaftnaha zakaźnika «Nalibocki» ŭ Vałožynskim rajonie.
Jak paviedamili va UUS, za 50 mietraŭ ad bieraha z łodki byli zaŭvažany charakternyja ślady samahonnaj vytvorčaści. Pry dalejšym abśledavańni vyjaŭlena samahonnaja vytvorčaść, jakaja składałasia ź siami mietaličnych jomistaściej, u jakich było pryhatavana bolš za tonu samahonnaj brahi.
Miarkujučy pa śladach, samahonščyki dabiralisia da mini-zavoda na łodcy, dla pryhatavańnia śpirtnoha vada zabirałasia z raki, adchody vylivalisia tudy ž.
Pry dalejšaj praviercy vioski Cajuny Vałožynskaha rajona, raźmieščanaj prykładna ŭ kiłamietry ad aparata, ustanoŭleny i ŭładalnik niezakonnaj vytvorčaści, žychar Vałožyna, dyrektar miascovaha pryvatnaha pradpryjemstva. U haspadarčych pabudovach, jakija jon aranduje ŭ miascovaj žycharki, było znojdziena jašče 80 litraŭ samahonu i łodka.
Da ahladu miesca ŭčynieńnia administracyjnych pravaparušeńniaŭ pryciahnuty śpiecyjalisty orhanaŭ lasnoj haspadarki, arhanizavany mierapryjemstvy pa vyvazie aparata i ačystcy terytoryi zakaźnika.
Supracoŭnikami UUS pravodzicca dalejšaja pravierka dla ŭstanaŭleńnia ŭsich saŭdzielnikaŭ samahonnaj vytvorčaści. Pa vynikach pravierki materyjały buduć pieradadzieny ŭ sud Vałožynskaha rajona dla pryciahnieńnia vinavatych da administracyjnaj adkaznaści za pravaparušeńni, źviazanyja ź niezakonnym abarotam ałkaholnych napojaŭ i parušeńniem ekanamičnaj biaśpieki.