Mižnarodny valutny fond prahnazuje, što VUP Biełarusi ŭ 2015 hodzie źnizicca na 2%, paviedamiŭ na pres-kanfierencyi 16 sakavika ŭ Minsku kiraŭnik misii fondu ŭ Biełarusi Devid Chofman. «Pavodle acenak kamandy fondu, vielmi vierahodna, što ŭ 2015 hodzie adbudziecca spad», — skazaŭ Chofman.
Jon udakładniŭ, što na dadzieny momant MVF prahnazuje źnižeńnie VUP Biełarusi na 2%, a ŭ nastupnym hodzie — niekatoraje adnaŭleńnie biełaruskaj ekanomiki. «Ale ŭ adsutnaść źmienaŭ ekanamičnaj palityki tempy rostu ŭ Biełarusi zastanucca nizkimi ŭ nastupnaj piacihodcy», — padkreśliŭ Chofman.
Pavodle jaho słoŭ, dla «źmieny trajektoryi ekanamičnaha rostu» Biełarusi nieabchodna pravodzić paśladoŭnuju ekanamičnuju palityku, prytrymlivacca rekamiendacyj fondu i pačać ažyćciaŭleńnie «hłybokich strukturnych reformaŭ» z metaj pavyšeńnia pradukcyjnaści pradpryjemstvaŭ.
«Pry takim scenary tempy rostu ŭ 2015-2016 hadach mohuć być navat nižej za prahnazavanyja. Adnak hetyja straty kampiensujucca značna bolš vysokimi tempami ekanamičnaha rostu ŭ nastupnyja hady», — skazaŭ kiraŭnik misii. Jak ličać ekśpierty fondu, dadaŭ jon, u vypadku praviadzieńnia hłybokich ekanamičnych reformaŭ tempy rostu mohuć značna paskorycca, i «ŭ siarednieterminovaj pierśpiektyvie ekanomika Biełarusi moža raści na 4-5% u hod».
Jak paviedamlałasia raniej, na minułym tydni na pasiadžeńni prezidyuma Savieta ministraŭ razhladałasia kancepcyja sacyjalna-ekanamičnaha raźvićcia na 2016-2020 hady. Kancepcyja praduhledžvaje dva scenara ekanamičnaha raźvićcia krainy ŭ zaležnaści ad źniešnich umoŭ. Pavodle pieršaha siaredniehadavyja tempy rostu VUP mohuć skłaści 2,4%, pavodle druhoha — 3,3%.
