Kiraŭniki samaabvieščanych «DNR» i «ŁNR» Alaksandr Zacharčanka i Ihar Płatnicki ŭ piatnicu źviarnulisia z sumiesnaj zajavaj da kanclera Hiermanii Anhieły Mierkiel i prezidenta Francyi Fransua Alanda.

Jak havorycca ŭ zvarocie, tekst jakoha pryvodzić «Danieckaje ahienctva navin», Zacharčanka i Płatnicki «zmušanyja źviarnucca» da Mierkiel i Alanda «jak da harantaŭ minskich damoŭlenaściaŭ» «z prośbaj akazać cisk na Ukrainu, až da ŭviadzieńnia piersanalnych i ekanamičnych sankcyj, kab prymusić jaje kiraŭnictva da vykanańnia Kompleksu mier, zaćvierdžanaha kantaktnaj hrupaj 12 lutaha hetaha hoda ŭ Minsku z Vašym aktyŭnym udziełam».

12 lutaha Zacharčanka i Płatnicki razam z členami kantaktnaj hrupy pa Ukrainie padpisali hety Kompleks mier. Charakterna, što, u adroźnieńnie ad astatnich padpisantaŭ — pasła Chajdzi Taljavini, druhoha prezidenta Ukrainy Leanida Kučmy i pasła RF va Ukrainie Michaiła Zurabava, ukazanych u dakumiencie z pasadami, u vypadku ź liderami sieparatystaŭ byli pastaŭleny tolki ich proźviščy, pakolki DNR i ŁNR nie pryznanyja Zachadam. U zvarocie ž da Mierkiel i Alanda Płatnicki i Zacharčanka nazvanyja «kiraŭnikami ŁNR i DNR».

U dakumiencie adznačajecca, što, na dumku lideraŭ sieparatystaŭ, «Ukraina adkryta sabatuje i nie vykonvaje pryniatyja na siabie abaviazacielstvy».

Jak ličać kiraŭniki samaabvieščanych respublik, pa-pieršaje, «ukrainskija siłaviki zryvajuć hrafik advodu ciažkich uzbrajeńniaŭ i nie dajuć infarmacyi ab novych miescach jaho dysłakacyi».

Pa-druhoje, («i heta hałoŭnaje!» — adznačajecca ŭ dakumiencie), Viarchoŭnaja Rada jašče navat nie pačała praceduru razhladu pastanovy z ukazańniem pieraliku rajonaŭ, jakija nadzialajucca asablivymi pravami ŭ adpaviednaści z zakonam Ukrainy «Ab asablivym statusie Danbasa».

«Pry hetym 30 dzion, adviedzienyja dla realizacyi hetaha rašeńnia ŭ adpaviednaści z toj «darožnaj kartaj «, jakaja zaćvierdžanaja ŭ Kompleksie mier pa vykanańni minskich pahadnieńniaŭ, minajuć ŭžo zaŭtra, 14 sakavika», — nahadvajuć aŭtary zvarotu, padkreślivajučy svaju «prychilnaść minskim damoŭlenaściam i hatoŭnaść da poŭnaha i vyčarpalnaha palityčnaha ŭrehulavańnia kanfliktu».

Lidery sieparatystaŭ taksama źviarnuli ŭvahu kiraŭnikoŭ FRH i Francyi, što, «nasupierak minskim damoŭlenaściam, praciahvajecca i navat uzmacniajecca» ekanamičnaja błakada Danbasa z boku Kijeva.

«U vyniku vajennaj ahresii Ukrainy ekanomika ŭ našych respublikach znachodzicca na miažy kałapsu, piensii i inšyja sacyjalnyja dapamohi pa-raniejšamu nie vypłačvajucca».

«Deficyt hryŭni dasiahnuŭ takoj vastryni, što hramadzianie i mały biźnies užo raźličvajucca ŭ roznych valutach», adznačajecca ŭ zvarocie.

Padvodziačy vyniki, Zacharčanka i Płatnicki prosiać dasłać u Danieck i Łuhansk śpiecyjalistaŭ z Hiermanii i Francyi dla dapamohi ŭ adnaŭleńni bankaŭskaj sistemy Danbasa.

Sieparatysty taksama prosiać zabaranić ŭjezd na terytoryju ES «za złačynstvy suprać čałaviečnaści», «masavyja parušeńni pravoŭ čałavieka», «źniščeńnie mirnaha nasielnictva z dapamohaj vajennaha teroru i ekanamičnaj błakady» premjer-ministru Ukrainy Arsieniju Jacieniuku, ministru abarony krainu Ściapanu Paŭtaraku, sakrataru SNBA Alaksandru Turčynavu, kiraŭniku MUS Ukrainy Arsienu Avakavu, kiraŭniku administracyi prezidenta Ukrainy Barysu Łožkinu i aliharchu Iharu Kałamojskamu.

Jak viadoma, ciapier sankcyi ES dziejničajuć u dačynieńni da samich aŭtaraŭ inicyjatyvy — Płatnicki trapiŭ u sankcyjny śpis jašče ŭ lipieni minułaha hoda, kali zajmaŭ pasadu «ministra abarony ŁNR», Zacharčanku dadali ŭ sankcyjny śpis u vieraśni 2014-ha.

Aproč inšaha, Zacharčanka i Płatnicki chočuć, kab Zachad prypyniŭ finansavuju dapamohu «antynarodnamu ŭradu Jacaniuka—Avakava da taho času, pakul nie buduć zabiaśpiečanyja ŭmovy dla źniaćcia ekanamičnaj błakady z Danbasa i palityčnaha ŭrehulavańnia kanfliktu».

Raniej u Daniecku zajavili pra pahrozu zryvu mirnaha pracesu z-za niežadańnia Kijeva vyznačyć pieralik nasielenych punktaŭ z asablivym statusam.

Pradstaŭniki DNR zajavili, što pakidajuć ukrainskamu boku sutki na vyrašeńnie pytańnia.

«My znachodzimsia na miažy taho, što minski praces budzie sarvany i kompleks mier pa vykanańnia minskich damoŭlenaściaŭ budzie dezavujavany», — zajaviŭ «paŭnamocny pradstaŭnik DNR» Dzianis Pušylin. U čaćvier Pušylin ad imia «DNR» źviarnuŭsia da ŭdzielnikaŭ «narmandskaj čaćviorki» z prośbaj akazać cisk na Kijeŭ z tym, kab zabiaśpiečyć zachavańnie minskich pahadnieńniaŭ.

U minuły aŭtorak u Viarchoŭnaj Radzie paabiacali da 14 sakavika pryniać pastanovu z vyznačeńniem miežaŭ terytoryi, na jakuju raspaŭsiudzicca zakon ab asablivym statusie miascovaha samakiravańnia na Danbasie.

Pavodle infarmacyi na sajcie ŭkrainskaha parłamienta, bližejšaje plenarnaje pasiadžeńnie Rady zapłanavana na 17 sakavika.

Što tyčycca amnistyi sieparatystaŭ, u Kijevie adznačajuć, što nie źbirajucca admaŭlacca ad pieraśledu vinavatych u «złačynstvach suprać čałaviečnaści».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?