Pavodle 8 unikalnych ekśpiedycyj pa Biełarusi kampanija «Budźma biełarusami!» zrabiła mapu «Kraina cmokaŭ», jakaja ad siońnia jość na zapraŭkach A-100 u Minsku.
Materyjały vandrovak byli padrabiazna pradstaŭlenyja na śpiecyjalnym sajcie cmok.budzma.org. Zatym bolš čym 80 nasielenych punktaŭ i cikavostak, jakija naviedała ekśpiedycyja, byli naniesienyja na spadarožnikavuju mapu, jakuju možna pabačyć pa spasyłcy.
— Asnoŭnaja ideja mapy «Kraina Cmokaŭ» — pryciahnuć uvahu da biełaruskaj historyi i kultury, da našaj litaratury i mifałohii. Prademanstravać, što našaja kultura — nievyčarpalnaja i bahataja krynica i dla turyzmu, i dla brendynhu haradoŭ. My vybrali Cmoka — jon zahadkavy i charyzmatyčny, jon — niepieramožny asiłak pavodle našych kazak i lehiend, — kaža kaardynatarka kampanii «Budźma biełarusami!» Alena Makoŭskaja. — Nu a vyniki pošukaŭ Cmoka akazalisia nastolki cikavyja, što my vyrašyli ŭvasobić ich u mapie.
Dyzajn mapy raspracavaŭ Artur Vakaraŭ (studyja «Adliha»), a tekst skłaŭ žurnalist Hleb Łabadzienka, jaki razam z fatohrafam Alaksandram «Tarancinam» Ždanovičam prajechaŭ dziela hetaha pa Biełarusi bolš za 7000 kiłamietraŭ.
— Za čas hetych nievierahodnych vandrovak Cmok padpilnoŭvaŭ nas na kožnym kroku! — kaža žurnalist-vandroŭnik Hleb Łabadzienka. — Ad plušavaj cacki kala Mirskaha zamka da miedaljona na hałoŭnaj homielskaj skulptury, jakaja vyjaŭlaje pieršaha mifałahičnaha žychara horada. Ad nievierahodnaj pryhažości talerki XVIII stahodździa ŭ Mahiloŭskaj ratušy da adzinaha ŭ Biełarusi pomnika Cmoku ŭ Lepieli, adkrytaha ŭ 2013 hodzie.
Stvaralniki mapy pryznajucca, što časam vandroŭki byli dosyć niebiaśpiečnyja. Udzielniki ekśpiedycyi trapili ŭ adzinuju ŭ Biełarusi piačoru pad Hłybokim, spuścilisia na minus druhi padziemny pavierch Ružanskaha pałaca Sapiehaŭ, uźnialisia na dach kaścioła, dzie byŭ pachavany apošni karol Rečy Paspalitaj, sustreli statak z 57 zubroŭ u Biełaviežskaj puščy, znajšli ahromnisty raskołaty vałun u lesie pad Słonimam, 5000-hadovyja šachty pad Vaŭkavyskam…
Takich karotkich historyj na mapie «Kraina Cmokaŭ» — bolš za 80! Usie punkty naniesienyja na asnovu mapy Biełarusi z dakładnym paznačeńniem kaardynat GPS. Na advarocie mapy dajecca karotkaje apisańnie kožnaha punkta, a taksama spasyłki na adpaviednyja materyjały na sajcie cmok.budzma.org.
Jak atrymać hetuju ŭnikalnuju mapu? Ad 8.00 siońniašniaha dnia (12.03, čaćvier) jana tajamničym čynam źjavicca na ŭsich aŭtazapraŭkach A-100 u Minsku.
Dla atrymańnia mapy treba vykanać 2 prostyja ŭmovy:
- Źviarnucca da apieratara pa-biełarusku.
- Nazvać parol: «Biełaruś — kraina Cmokaŭ!».
Śpiašajciesia, kolkaść mapaŭ abmiežavanaja!.. Dla tych, kamu nie chopić mapy, nahadvajem, što jaje možna spampavać ci pabačyć u farmacie Google Maps tut.
Budźma Cmokami!
P.S. Kampanija «Budźma biełarusami!» ščyra dziakuje sietcy zapravak A-100 za padtrymku akcyi.
