Papiaredniaje pasiadžeńnie Viarchoŭnaha suda pa isku Ministerstva justycyi ab likvidacyi Partyi kamunistaŭ Biełaruskaj (PKB) pryznačana na 30 studzienia. Ab hetym BiełaPAN paviedamiŭ lider PKB Siarhiej Kalakin.

Pavodle jaho słoŭ, heta budzie «rasparadčaje pasiadžeńnie», na jakim «budzie kančatkova vyznačana data sudovaha razboru, mahčyma, pryznačany sudździa, buduć zasłuchanyja arhumienty Miniusta i našy arhumienty, mahčyma, niejkija dadatkovyja chadajnictvy».

Jak paviedamiŭ S.Kalakin, pazicyja partyi ŭ adnosinach da iska Ministerstva juystycyi ab likvidacyi PKB zastajecca byłoj: «My ličym hety isk niearhumientavanym, pazicyju Miniusta — nie adpaviednaj zakonam Biełarusi i Kanstytucyi. U Kanstytucyi akreśleny absalutny pieralik abstavinaŭ, zhodna ź jakimi partyja moža być zakryta, — heta raspalvańnie rasavaj, nacyjanalnaj, relihijnaj varožaści, prapahanda vajny i hetak dalej. Ničoha z hetaha PKB nie ździajśniała. A takija rečy, jak pamyłki ŭ spravavodstvie, naprykład, nie mohuć być padstavaj dla likvidacyi partyi».

Na dumku S.Kalakina, užo samo nakiaravańnie isku ab likvidacyi partyi ŭ sud u toj pieryjad, kali dziejnaść PKB prypyniena, parušaje paradak padačy iskavaj zajavy. «U suviazi z hetym my ŭžo źviarnulisia ŭ Viarchoŭny sud z prośbaj admianić rašeńnie suda ab zaviadzieńni spravy pa isku», — paviedamiŭ lider PKB.

Jon taksama skazaŭ, što 22 studzienia ŭ Miniust byli nakiravanyja nieabchodnyja dakumienty ab likvidacyi tych niedapracovak, na padstavie jakich dziejnaść partyi prypyniena. «My zdali prykładna 1.300 staronak dakumientaŭ. Ja liču, što na hety čas u partyi i jaje dziejnaści niedapracovak niama i pierad zakonam u nas usio čysta», — zaznačyŭ S.Kalakin.

Nahadajem, 4 studzienia Ministerstva justycyi padało ŭ Viarchoŭny sud isk ab likvidacyi Partyi kamunistaŭ Biełaruskaj. U iskavych pretenzijach havorycca, što paśla prypynieńnia dziejnaści PKB na šeść miesiacaŭ 2 žniŭnia 2007 hoda PKB ažyćciaŭlała dziejańni, jakija joj zabaronieny zakanadaŭstvam u hety pieryjad. U pryvatnaści, Miniustam ustanoŭlena dziejnaść partyi, skiravanaja na ažyćciaŭleńnie zboru podpisaŭ, pikietavańnia, a taksama praviadzieńnie šerahu inšych mierapryjemstvaŭ; PKB poruč ź inšymi sub\jektami palityčnaj dziejnaści padpisała pahadnieńnie ab pryncypach udziełu ŭ palityčnaj kampanii pa vybarach u Pałatu pradstaŭnikoŭ Nacyjanalnaha schodu Biełarusi, što zapłanavany na vosień 2008 hoda, i viała aktyŭnuju mižnarodnuju dziejnaść.

Siarhiej Pulša, BiełaPAN

Клас
0
Панылы сорам
0
Ха-ха
0
Ого
0
Сумна
0
Абуральна
0