Biełaruskaja čyhunka dadatkova arhanizavała ruch pamiž Minskam i Hrodna ŭ ranišni čas. Z 29 sakavika pa maršrucie Minsk — Maładziečna — Lida — Hrodna pryznačany ciahnik mižrehijanalnych linij ekanamkłasa № 673/674, paviedamili ŭ pres-słužbie BČ.
Sastaŭ budzie adpraŭlacca sa stancyi Minsk-Pasažyrski ranicaj u 06.56 i prybyvać u Hrodna ŭ 12.06. Čas adpraŭleńnia ciahnika ŭ zvarotnym napramku — 14.24, prybyćcia ŭ stalicu — 19.33.
U darozie praduhledžany dva prypynki — u Maładziečnie i Lidzie. «Metaj realizacyi hetaha prajekta źjaŭlajecca ŭzmacnieńnie transpartnych suviaziej pamiž rehijonami krainy, pašyreńnie mahčymaściej pasažyraŭ u vybary varyjantu pajezdki, pavyšeńnie jakaści pasłuh», — adznačyła pres-słužba Biełaruskaj čyhunki.
