interfax.by
Z 10 sakavika źmieniacca praviły ŭvozu niekatorych tavaraŭ dla asabistaha karystańnia z-za miažy. Dla bytavoj techniki, elektroniki i santechniki ŭstalavany biazmytny limit u adnu adzinku kožnaha tavaru ź śpisu raz u try hady, dla aŭtamabilnych šyn — kamplekt z 4 štuk raz u dva hady.
Infarmacyja pra heta siońnia źjaviłasia na sajcie Dziaržaŭnaha mytnaha kamiteta.
«Analiz narmatyŭnych terminaŭ vykarystańnia roznych katehoryj tavaraŭ pakazaŭ, što čas słužby bytavoj techniki, santechničnaha abstalavańnia składaje, jak praviła, nie mienš za 5 hadoŭ, šyn — nie mienš za 2 hady», — kažuć u DMK ab svaich nazirańniach. Na hetych padstavach i byli pierahledžany normy ŭvozu niekatorych tavaraŭ.
U pryvatnaści, adnoj adzinkaj tavaru raz u try hady abmiežavany ŭvoz u Biełaruś roznaj bytavoj techniki, elektroniki, kampjutaraŭ, noŭtbukaŭ, płanšetaŭ, santechniki, techničnaha abstalavańnia, dziciačych kalasak i niekatorych inšych rečaŭ.
Limit budzie dziejničać tolki dla tavaraŭ adnoj hrupy. Heta značyć, što pryvieźci z-za miažy, naprykład, dźvie mikrachvaloŭki budzie nielha. Druhaja ŭžo budzie abkładacca pošlinaj.
Pry hetym, kali kupić za miažoj adrazu i chaładzilnik, i hazavuju plitu, i pyłasos, to nijakich dadatkovych płaciažoŭ nie praduhledžana.
Novyja praviły ŭvozu zakranuć i aŭtamabilnyja šyny.
Na praciahu dvuch kalandarnych hadoŭ možna biaspošlinna pryvieźci tolki adzin kamplekt z 4 štuk (u dačynieńni da matacykłaŭ, mapiedaŭ i motaroleraŭ limit budzie jašče nižej — usiaho 2-3 adzinki tavaru) dla kožnaha transpartnaha srodku ŭ ułasnaści.
«Dla tavaraŭ, uviezienych z-za miažy z vypłataj sukupnaha mytnaha płaciažu, abmiežavańni dziejničać nie buduć», — kamientujuć źmieny ŭ Dziaržaŭnym mytnym kamitecie.
