27 lutaha maci rasstralanaha pa pryhavory suda žychara Homiela Alaksandra Hrunova padała skarhu ŭ Kamitet AAN pa pravach čałavieka. Volha Hrunova prysutničała siońnia na adkryćci ŭ Homieli vystavy płakataŭ «Šeść arhumientaŭ suprać śmiarotnaj kary», dzie i paviedamiła žurnalistam ab svajoj zajavie ŭ mižnarodnuju instancyju.
Zajaŭnica prosić KPČ pryznać parušeńni pravoŭ čałavieka ŭ dačynieńni da jaje, a mienavita: art. 7 Mižnarodnaha pakta ab hramadzianskich i palityčnych pravach, dzie havorycca ab katavańniach i ab tym, što «nichto nie pavinien źviedvać žorstkaje, biesčałaviečnaje abychodžańnie». Taksama Volha Hrunova prosić Kamitet AAN pa pravach čałavieka jašče raz zaklikać biełaruskija ŭłady admianić śmiarotnuju karu i źmianić nacyjanalnaje zakanadaŭstva.
Pavodle słoŭ pravaabaroncy Leanida Sudalenki, maci rasstralanaha vyčarpała ŭsie srodki pravavoj abarony ŭnutry krainy, tamu źviarnułasia ŭ KPČ. «Volha Hrunova źviartałasia ŭ rajonny i abłasny sud, a taksama ŭ Viarchoŭny i Kanstytucyjny, da deputataŭ Pałaty pradstaŭnikoŭ NS, u Administracyju prezidenta. Ale čynoŭniki jaje nie čujuć. Svajakam pryhavoranych da śmiarotnaj kary nie paviedamlajuć navat ab miescy pachavańnia ich blizkaha čałavieka, što prynosić im pakuty. Nacyjanalnaje zakanadaŭstva treba źmianiać. My, pravaabaroncy, upeŭnienyja, što ŭ Biełarusi z časam — mahčyma, navat u chutkim časie — budzie nakładzieny maratoryj na śmiarotnuju karu», — prakamientavaŭ Leanid Sudalenka.
Kaardynatar prahram homielskaha Centra stratehičnaj ciažby Vasil Palakoŭ dadaŭ, što pytańnie śmiarotnaj kary źjaŭlajecca nie tolki prablemaj kryminalnaha zakanadaŭstva, ale i sacyjalnaj, bo pakutujuć blizkija ludzi pryhavoranych da rasstrełu. «Śmiarotnaja kara nie ŭpłyvaje na kryminahiennuju abstanoŭku, zabojcaŭ mienš ad hetaha nie stanovicca. Užo ciapier u Homielskim abłasnym sudzie razhladajucca kryminalnyja spravy pa žorstkich zabojstvach, abvinavačvanym pa jakich pahražaje śmiarotnaja kara», — adznačyŭ Vasil Palakoŭ.
Nahadajem, maci Alaksandra Hrunova z dapamohaj pravaabaroncaŭ ažyćciaviła stratehičnuju ciažbu, nakiravanuju na źmianieńnie jak zakanadaŭstva, tak i praktyki jaho prymianieńnia, jakija kožny raz viaduć da pakutaŭ baćkoŭ i svajakoŭ rasstralanych u Biełarusi.
26-hadovy Alaksandr Hrunoŭ byŭ pryznany vinavatym u zabojstvie homielskaj studentki Natalli Jemialjančykavaj. Dziaŭčyna zahinuła ŭ vieraśni 2012 hoda — joj było naniesiena bolš za 100 nažavych ranieńniaŭ. Heta zabojstva Hrunoŭ učyniŭ praz hod paśla adbyćcia pakarańnia za žorstkaje źbivańnie sužyciela svajoj maci, u vyniku jakoha toj pamior.
Pieršy śmiarotny pryhavor Hrunovu Homielski abłasny sud vynies u červieni 2013 hoda, adnak praz čatyry miesiacy Viarchoŭny sud Biełarusi admianiŭ pryhavor i nakiravaŭ spravu na novy sudovy razbor u sud pieršaj instancyi. U śniežni 2013 hoda Homielski abłasny sud paŭtorna vynies śmiarotny pryhavor Hrunovu. U krasaviku 2014 hoda Viarchoŭny sud pakinuŭ pryhavor bieź źmianieńnia.
Hrunoŭ byŭ rasstralany 22 kastryčnika 2014 hoda. 4 listapada Volha Hrunova atrymała try pasyłki z rečami syna z kamiery śmiarotnikaŭ. U adnoj ź ich była turemnaja roba, u jakoj jon znachodziŭsia ŭ kamiery, u astatnich — asabistaje adzieńnie, rečy i tufli.
