Uznaharody Experty.by jašče nie abvieścili datu praviadzieńnia i poŭny śpis naminantaŭ, ale arhanizatary ŭžo nazvali imia pieršaha pieramožcy.
U naminacyi «Najlepšy fołk-albom» pryz atrymaje hurt Vuraj za dysk «Rajok».
Albom atrymaŭ ad štatnych ekśpiertaŭ (4 stałyja krytyki) adznaku 8,25 bały z 10 mahčymych dy trapiŭ u top-10 za 2014 hod pa viersii štatnych ekśpiertaŭ i pa viersii vialikaha žury (16 biełaruskich muzyčnych žurnalistaŭ). Jon taksama ledź nie patrapiŭ u top-10 pa viersijach zamiežnych ekśpiertaŭ (Łatvija, Litva, Polšča, Rasija, Ukraina) i narodnych ekśpiertaŭ (aktyŭnyja karystalniki sajta).
Navat naminalnaha sapiernika dla jaho ŭ hetym hodzie nie znajšłosia.
«Pieramoha Vuraj atrymałasia biezalternatyŭnaj, ale pry hetym całkam zasłužanaj. Heta albom, jaki ŭražvaje svaim aryhinalnym padychodam dy hruntoŭnaj prapracoŭkaj. Jon vyvodzić hurt na jakasna novy ŭzrovień i ja mahu pažadać im tolki nie spyniacca na dasiahnutym», — patłumačyŭ adzin sa štatnych ekśpiertaŭ, hałoŭny redaktar Tuzin.fm Siarhiej Budkin.
Siońnia, 27 sakavika ŭ 19:00 hurt Vuraj daść solny kancert u kłubie «Studio 67» (Partyzanski pr. 2), dzie prezientuje publicy klip «Sasna pachiliłasia». Uvachod volny.
Experty.by taksama vyrašyli dadać novuju naminacyju: «Najlepšy indzi-pop/elektronny albom».
U minułym hodzie hałoŭnuju ŭznaharodu partału atrymaŭ elektronščyk (((O))). U hetym hodzie jon pazmahajecca ŭ admysłovaj naminacyi z Mustelide i Vegetables.
«Heta padvojenaja naminacyja, jakaja abjadnoŭvaje dźvie pamiežnyja źjavy. Z adnaho boku alternatyŭnuju pop-muzyku, dzie čaściakom možna pačuć elemienty elektroniki. Ź inšaha boku elektroniku, ź jakoj my ahladajem častku, najbolš nabližanuju da alternatyŭnaha mejnstrymu. My vyrašyli, što pryśpieŭ čas źviarnuć uvahu publiki na hety ekśpierymientalny siehmient sučasnaj biełaruskaj sceny, jaki aktyŭna raźvivajecca», – patłumačyŭ kiraŭnik prajekta Experty.by Źmicier Biezkaravajny.
27 sakavika (((O))) jakraz pradstaviŭ trek «Łysy» — elektronnuju apracoŭku viadomaha tanca, zhranuju supolna z dudarom Jaŭhienam Baryšnikavym.
Inšyja naminanty ŭznaharod Experty.by buduć abvieščanyja paźniej.
Experty.by nazavuć biełaruski Albom hoda ŭ sakaviku >>>
