U Minsku ŭ 2016 hodzie źjavicca pieršy kvartał, u jakim adnačasova buduć pradstaŭleny ofisnyja i handlovyja abjekty, haścinicy, spartyŭnyja, miedycynskija i azdaraŭlenčyja centry. Pra heta paviedamiŭ namieśnik načalnika adździeła kansałtynhu i analityki hrupy kampanija «Tvaja stalica» Andrej Čarnyšoŭ.
Jon raskazaŭ, što kvartał zajmaje častku praśpiekta Pieramožcaŭ pamiž vulicami Radužnaj i Brasłaŭskaj. Prastora pamiž katedžnym pasiołkam i spalnym rajonam ciapier pieratvarajecca ŭ centr dziełavoha i hramadskaha žyćcia. Cikavaść deviełapieraŭ uzrasła paśla budaŭnictva spartyŭnaha kompleksu «Minsk-Arena». Śledam za im źjavilisia handlovy centr «Arena-Sici» i štab-kvatera NAK z čatyrochzorkavaj haścinicaj «Viktoryja Alimp».
Jak zaznačyŭ ekśpiert, terytoryju kvartała aktyŭna asvojvajuć pryvatnyja zabudoŭščyki. U Drazdach raźmieščany bujny biźnies-centr Riviera Plaza z tryma ofisnymi błokami ŭ formie biełych karabloŭ. Nieŭzabavie kampazicyju dapoŭnić bujny SPA-kompleks z basiejnami i saŭnami. Pobač ź im raźmieščany biźnies-centr «Pakroŭski». Akramia taho, u miežach kvartała budujuć dva bujnyja kompleksy z žyłymi, ofisnymi i handlovymi płoščami — «Łazuryt» i D3.
«Raźvićciu kvartała spryjaje ŭdałaje miescaraźmiaščeńnie: z adnaho boku — praśpiekt Pieramožcaŭ, pa jakim možna chutka dabracca da centra horada, z druhoha — malaŭničaje miesca kala vadaschovišča, — ličyć ekśpiert. — Kvartał aryjentujecca nie tolki na susiednich žycharoŭ — jon pretenduje na toje, kab stać centram pryciahnieńnia ludziej z roznych častak horada».
Na dumku Čarnyšova, najbolšyja pierśpiektyvy ŭ kvartale ŭ spartyŭnych, rekreacyjnych i ofisnych abjektaŭ. «Haścinic tut dastatkova, a bujny handlovy centr i tak nie razbałavany vysokim trafikam. Mahčyma, situacyja budzie mianiacca z budaŭnictvam žyłych damoŭ u mikrarajonie Labiažy», — adznačyŭ śpiecyjalist.
U budučyni ŭ Minsku źjaviacca jašče dva dziełavyja kvartały. Samy bujny pabudujuć u rajonie aeraporta Minsk-1. Prajekt «Minsk-Mir» praduhledžvaje stvareńnie mižnarodnaha finansavaha centra, budaŭnictva bujnych ofisnych i handlovych abjektaŭ. Dziełavy kvartał źjavicca i ŭ rajonie skryžavańnia praśpiekta Niezaležnaści i vulicy Filimonava, dzie pa susiedstvie z Nacyjanalnaj biblijatekaj i biźnies-centram «Alaksandraŭ Pasaž» budujecca šmatfunkcyjanalny kompleks «Hazproma».
