Minsuviazi maje błakavać srodki ananimnaści ŭ internecie: ananimajziery, proksi, Tor >>>
Juryj Zisier. Fota: TUT.BY
Zasnavalnik TUT.BY Juryj Zisier apieratyŭna aznajomiŭsia z pastanovaj. Na jaho dumku, pryčyn dla paniki niama, ale z błakavańniami dziaržavie treba dziejničać abdumana:
«Na pieršy pohlad, nijakich žachaŭ nie baču.
Havorka idzie nie pra błakavańnie, a pra toje, što jano moža być. Dyk u nas usio moža być! Moža i biez zakona błakavacca.
Faktyčna, hetaja pastanova ŭdakładniaje sam miechanizm, ale pryncypova novaha ničoha niama, čaho treba było b pužacca. Mininfarm moža błakavać sajty, my heta viedajem, z 1 studzienia heta ŭstupiła ŭ siłu, tut nijakaj naviny niama.
Pamiataju, u staryja časy, u 2000-ja hady paradku błakavańnia sajtaŭ nie było, a sajty błakavalisia, kali treba. Jość «tory» u śpisie, niama ich — i tak mahli zabłakavać, nikomu za heta ničoha nie było.
Prablema moža paŭstać tolki tady, kali chtości vyrašyć pahulacca hetymi mahčymaściami.
Tut uspaminajecca Jehipiet. Na toj momant uzrovień praniknieńnia internetu byŭ tolki 6%. Siadzieli sabie amatary sacyjalnych sietak u internecie, pisali praklony ŭ adras viernych-niaviernych. Ale kali ŭrad «adsiek» sotavuju suviaź i internet, ludzi zastalisia biez srodkaŭ suviazi. Jany vyjšli na vulicy — prosta kab daviedacca pra naviny. Jany pryjšli na tuju samuju płošču Tachryr. I adtul nie syšli. Zamiest taho, kab błakavańnie internetu dapamahło ŭ supraćdziejańni revalucyi, jano jaje, ułasna kažučy, inicyjavała.
Cacka hetaja vielmi niebiaśpiečnaja. Spakusa vialikaja.
Baču, što kožny raz, jak u krainie niešta važnaje adbyvajecca, błakujuć sajty. Heta vielmi niapravilna z majho punktu hledžańnia — heta niebiaśpiečna dla dziaržavy.
Heta ci ničoha nie daje ŭ lepšym vypadku, ci maje advarotny efiekt».
Dzianis Blišč. Fota z asabistaj staronki Facebook
Były hałoŭny redaktar Onliner.by, a ciapier hałred Holiday.by Dzianis Blišč ličyć, što pakul niešta kazać pra pastanovu rana:
«Mnie zdajecca, treba čakać pravaŭžyvalnuju praktyku, kab nastolki šyrokuju pastanovu možna było niejak kamientavać».
Vadzim Stankievič. Fota z asabistaj staronki Facebook
Hałoŭny redaktar haziety «Kompjutiernyje viesti» Vadzim Stankievič nie ličyć pastanovu efiektyŭnaj u baraćbie z narkotykami:
«Ci pravilnaja hetaja pastanova? Ci treba dziaržavam śvietu zabaraniać ananimajziery? Davoli cikavaje pytańnie, navat krychu fiłasofskaje.
Na moj pohlad, tut lepš było b pytacca ab adekvatnaści zadekłaravanym metam, nakštałt baraćby sa «spajsami».
Tady adkaz budzie vidavočna admoŭnym, tamu što asnoŭnaja prablema ŭvohule nie źviazanaja z ananimnaściu ŭ Siecivie, a chutčej z adsutnaściu cyvilizavanaha rynku ŭžyvańnia psichična aktyŭnych rečyvaŭ, jaki, naprykład, užo farmirujecca ŭ ZŠA. Dla baraćby sa spajsami jość śpiecyjalizavanyja pryłady, naprykład, biełaruski ža (!) «AIPSIN». A zabaranić možna što chočaš. Jak by i pić na vulicy ŭ nas nielha, ale pjanych štości ad hetaha mienš nie robicca.
Ci budzie efiektyŭnaj pastanova? Zabłakujuć adno, źjavicca inšaje. Viadoma, źjavicca, navat možna prahnazavać, što mienavita.
Pa-pieršaje, nichto nie pieraškadžaje handlaram «spajsami» mianiać sajty, na jakich jany handlujuć, hetak ža chutka, jak i formuły narkotykaŭ. Sajtaŭ bieźlič, na ŭsie rejestru nie chopić. A sajty, suprać jakich sapraŭdy nakiravany hety zakon, mohuć prosta vypuścić mabilnyja prahramy, i tady ŭžo pryjdziecca zabaraniać Google Play, Windows Marketplace i AppStore, a heta budzie ŭžo zusim inšaja historyja.
Usim vidavočna, što dobryja mety — heta jak pryhožaja šylda, za jakoj nasamreč možna rabić toje, što patrebna tym, chto hetuju šyldu trymaje.
Abmiarkoŭvać ciapier hetyja mety možna doŭha i z hustam, ale chutka ŭsio stanie i tak vidavočna».
Iryna Leŭšyna. Fota z asabistaj staronki Facebook
Iryna Leŭšyna, hałoŭnaja redaktarka BiełaPAN, uspaminaje śniežańskija błakavańni infarmacyjnych sajtaŭ:
«Pastanova adnaznačna represiŭnaja. Choć ułady i sprabujuć prykrycca farmuloŭkami nakštałt «baraćby z raspaŭsiudam narkotykaŭ», jana nakiravanaja ŭ pieršuju čarhu na baraćbu ź inšadumstvam.
Zrešty, niečaha padobnaaha varta było čakać paśla śniežańskaha błakavańnia šerahu internet-resursaŭ, niahledziačy na toje, što tady jašče nie dziejničaŭ abnoŭleny zakon pra ŚMI, jaki daje prava błakavać internet-sajty.
Darečy, nichto ź dziaržorhanaŭ tak i nie ŭziaŭ na siabie adkaznaść na hetyja dziejańni.
Nie vyklučana, što ŭ śniežni była praviedziena «vyviedka bojem» — z metaj pahladzieć, jak paviaduć siabie zabłakavanyja resursy, jakija technałohii buduć vykarystoŭvać u sprobach abyści błakadu. I, mahčyma, vyniki byli ŭličanyja raspracoŭščykami ciapierašniaj pastanovy.
Viadoma, naprykład, što mnohija karystalniki tady mahli zachodzić na zabłakavanyja sajty praz ananimajziery. Ciapierašniaja pastanova praduhledžvaje błakavańnie i ananimajzieraŭ, i proksi-siervieraŭ, jakija dazvalajuć atrymlivać dostup da resursaŭ, jakija trapili ŭ niamiłaść da Minifarmu.
I ŭsio ž, jak śćviardžajuć IT-śpiecyjalisty, abmiežavać dostup da technałohij, jakija dazvalajuć abychodzić błakavańnie sajtaŭ, ułady mohuć tolki častkova — karystalniki pry žadańni ŭsio roŭna zmohuć atrymać dostup da cikavych im resursaŭ.
Šmat pytańniaŭ uźnikaje da farmavańnia «čornaha śpisu sajtaŭ». Mininfarmu i inšym dziaržorhanam tut dajucca faktyčna nieabmiežavanyja pravy. U adroźnieńnie ad zabłakavanych resursaŭ, jakija navat nie mohuć asprečyć rašeńnie ab uniasieńni ŭ čorny śpis u sudzie — sudovy paradak abskardžvańnia pastanovaj nie praduhledžany.
Niama nijakich sumnievaŭ u tym, što pastanova pryniataja z metaj u patrebny momant «zatyknuć rot» alternatyŭnym krynicam infarmacyi.
Na fonie finansava-ekanamičnych prablem jany mohuć mocna pieraškodzić niaźmiennamu kandydatu ŭ prezidenty. Zhadvajecca ŭ suviazi z hetym ekstrannaja sustreča ministra infarmacyi Lilii Ananič z kiraŭnikami niedziaržaŭnych ŚMI 20 śniežnia. Ministr aburałasia tym, jak niezaležnyja ŚMI «nie pa-dziaržaŭnamu» aśviatlali kryzis na valutnym rynku, što hrymnuŭ napiaredadni, i pahražała im aficyjnymi papiaredžańniami. A praz hadzinu paśla sustrečy byli zabłakavanyja sajty».
Michaił Vołčak. Fota z asabistaj staronki «UKantakcie»
Natchnialnik biełaruskaha Pirackaha ruchu Michaił Vołčak razhladaje techničny bok prablemy:
«Ničoha nasamreč novaha niama. Ułady pačali vykarystoŭvać śviežuju terminałohiju i, mahčyma, «prakačali» svajo prahramnaje zabieśpiačeńnie, kab bolš efiektyŭna błakavać toje, što pažadajuć. Jany rehularna rabili i praciahvajuć rabić błakiroŭki resursaŭ sieciva nie tolki kryminalnaha charaktaru.
Z adnaho boku, nichto nie budzie spračacca z tym, što treba strymlivać «nielehalny raspaŭsiud» narkotykaŭ, ź inšaha — adbyvajecca lehalizacyja cenzury i uzmacnieńnie pazasudovaj kampietencyi orhanaŭ vykanaŭčaj ułady.
Heta vielmi nahadvaje praktyku błakavańnia sajtaŭ u Rasii, jakaja tam pačałasia dva hady tamu. Ale u nas heta, jak zvyčajna, adbyvacca biez abmierkavańnia hramadskaści i sieciŭnych žycharoŭ. Ułady ličać što jany razumniejšyja za sieciva i hramadzian. Heta prablema.
Nakont efiektyŭnaści. Chto viedaje architekturu «ananimajzieraŭ», zmoža biez pytańniaŭ abyści hetyja błakavańni.
Pa-pieršaje, šmat jakija servisy vykarystoŭvajuć dynamičny śpis adrasoŭ siervieraŭ (IP). Heta značyć, što tym, chto zadasca metaj błakavać resursy, pryjdziecca za dzień dadavać sotni novych adrasoŭ.
Pa-druhoje, jość šmat płatnych servisaŭ u siecivie, jakija dajuć mahčymaść ananimnaści. Tut uładam pryjdziecca padpisvacca na ŭsie płatnyja servisy ŭ siecivie i adsočvać adrasy, a ich raście ŭsio bolej i bolej.
I narešcie, kožny bolš-mienš prasunuty karystalnik moža stvaryć svaje ananimajziery na lubym virtualnym sierviery ŭ siecivie — i padzialicca ź siabrami. A tut užo centralizavanaje błakavańnie, kaniešnie, budzie technična mahčymym, ale arhanizacyjna vielmi darahim zaniatkam.
Padkreślu, što asnoŭnaja prablema nie ŭ tym, što vyjšaŭ taki dakumient (mahčyma, bolšaść hramadstva ź im i pahadziłasia b), a ŭ tym, što vykanaŭčaja ŭłada ŭsio bolš i bolš ihnaruje dumku hramadstva i viadzie sabie zakryta, prymajučy važnyja dla bolš čym pałovy nasielnictva krainy rašeńni.
Na moj pohlad, takija zakrytyja dziejańni pahłyblajuć niedavier sieciŭnaj supolnaści da ŭłady. A vyniki niedavieru — heta ŭciečka mazhoŭ u bolš svabodnyja krainy i siehmienty sieciva.
Ludmiła Čekina. Fota: TUT.BY
Dyrektar UP «Nadziejnyja prahramy», juryst Ludmiła Čekina, adznačyła nievidavočnyja momanty ŭ pastanovie:
«Cikava, što dziejnaść sajtaŭ, jakija dazvalajuć atrymać ananimny dostup da resursu, u nas nie zabaronienaja. Ale na ŭzroŭni padzakonnaha narmatyŭnaha akta ŭvodzicca prava inśpiekcyi prymać rašeńnie ab abmiežavańni dostupu da ich. Heta značyć, jany nie zabaronienyja, ale dostup moža być abmiežavany pa vyrašeńni BiełDIE. Nie zrazumieła, na padstavie jakoha narmatyŭna-pravavoha akta ŭ ich dziejnaść mohuć umiešvacca.
Tearetyčna, uładalnik sajta-ananimajziera moža padać u sud, ale ź niepradkazalnym vynikam.
Jon moža abapiracca na ahulnyja pałažeńni hramadzianskaha zakanadaŭstva ab tym, što jon maje prava vieści nie zabaronienuju zakonam dziejnaść. Ale sud moža pryniać da viedama mienavita hety narmatyŭny akt — i skazać, što ŭ BiełDIE jość prava na abmiežavańnie dostupu da hetaha sajtu. Na moj pohlad, u najaŭnaści kalizija zakanadaŭstva.
Samo pa sabie abmiežavańnie dostupu da sajtaŭ było praduhledžanaje zakonam ab ŚMI, u pastanovie padstavy dla prymusovaha abmiežavańnia paznačanyja tyja ž.
Pry hetym vielmi cikavy paradak abskardžvańnia. Ničoha nie havorycca pra toje, jakim čynam abskardžvajecca abmiežavańnie, kali ŭładalnik resursu ličyć jaho niezakonnym.
Havorycca tolki pra paradak abskardžańnia, kali ŭładalnik resursu likvidavaŭ vyjaŭlenyja niedachopy. Tady jon piša pra heta zajavu ŭ Ministerstva infarmacyi. Pry hetym Ministerstvu dajecca vielmi vialiki termin — miesiac — na toje, kab razhledzieć hety zvarot. Ab sudovym paradku abskardžańnia ničoha nie havorycca.
Cikava asabista dla mianie, jak dla jurysta, toje, što ŭpieršyniu ŭvodzicca termin «infarmacyjny resurs (jaho składnik), raźmieščany ŭ sietcy Internet». Uvodzicca takoje aznačeńnie: «internet-sajt, staronka internet-sajta, veb-partał, forum, błoh, čat, prahrama dla mabilnaj pryłady i inšyja resursy, jakija majuć padklučeńnie da sietki Internet». Da hetaha ŭ nas było tolki aznačeńnie «infarmacyjnaha resursu», jakoje źmiaščałasia ŭ zakonie RB «Ab infarmacyi, infarmatyzacyi i abaronie infarmatyzacyi» i aznačeńnie «internet-resursu», što źmiaščałasia ŭ Pastanovie ad 29 červienia 2010 h. № 4/11.
Jašče cikavaje pytańnie: kali na častcy infarmacyjnaha resursu raźmieščanaja zabaronienaja infarmacyja, ci budzie abmiažoŭvacca dostup da ŭsiaho infarmacyjnaha resursu ci tolki da toj jaho častki? I chto budzie heta vyrašać?»
Ludmiła paćviardžaje: kali, da prykładu, na staroncy «UKantakcie» karystalnik apublikavaŭ zabaronienuju infarmacyju, niezrazumieła, ci budzie błakavacca sacsietka całkam.
