Niečakanaja zajava radykalnaha sajta 1863x.com była zroblenaja niekalki dzion tamu. Aŭtar materyjału, jaki padpisvajecca «Patryjot», ličyć, što Biełarusi varta rychtavacca da vajny. «Va ŭmovach realnaj rasijskaj pahrozy, naša hramadstva pavinna ŭmieć być hnutkim», — piša partał.
Na dumku «Patryjota», na poli dziejnaści nacyjanalistaŭ źjaviŭsia novy hulec — Alaksandr Łukašenka.
«Kiraŭnik dziaržavy i raniej nieadnarazova kazaŭ i ab padtrymcy biełaruskaj movy, i ab umacavańni niezaležnaści krainy. Adnak, kali ŭ minułyja hady padobnyja zajavy možna było ličyć kanjunkturnymi i nakiravanymi na dasiahnieńnie jakich-niebudź vuzkich palityčnych metaŭ, to siońnia, kali jany hučać na fonie vajny va Ukrainie, davier da ich našmat bolš. Akramia taho, u vykazvańniach Łukašenki hučać zusim novyja idei», — pierakanany aŭtar.
Niekalki słovaŭ było pryśviečana vykazvańniam Łukašenki na pres-kanfierencyi 29 studzienia.
«Mnohija žurnalisty i analityki adznačyli, što Łukašenka vyjaŭlaŭ — chaj pakul tolki na słovach — pryjaznaść da hramadzianskaj supolnaści. Ahresii, varožaści nie hučała. Nie rabicie «Majdanu» — a ŭ astatnim rabicie, što chočacie».
«Łukašenku i Biełarusi patrebny tyja, chto hatovy ŭ adkazny momant abaraniać dziaržavu nie za hrošy i materyjalnyja dabroty i nie z-pad pałki. Patrebnyja ludzi, hatovyja pamierci za niezaležnaść krainy. BRSM na hetuju rolu nie padychodzić pa zrazumiełych pryčynach. Čynoŭniki na front nie pojduć. Biznes budzie ratavać svaje kapitały. Armija mocnaja, ale navat ŭłady razumiejuć, što jana adna nie spravicca. Upłyŭ śpiecsłužbaŭ Rasii na ŭsie hetyja hrupy nasielnictva taksama nie varta skidać z rachunkaŭ». Jak miarkuje «Patryjot», takoj siłaj, jakaja budzie baranić niezaležnaść Biełarusi mohuć stać nacyjanalisty i patryjoty.
Voś što prapanujecca rabić hetym ludziam:
«Patryjoty i nacyjanalisty pavinny pryniać aficyjnuju simvoliku krainy, tym bolš, što, dla vializnaj častki biełarusaŭ jana stała «svajoj». Ułady ž mohuć pajści na lehalizacyju bieł-čyrvona-biełaha ściaha, pryznaŭšy jaho, jak i hierb «Pahonia», histaryčnym i admoviŭšysia ad pieraśledaŭ za jaho vykarystańnie.
Patryjoty i nacyjanalisty pavinny admovicca ad idei «baraćby z dyktaturaj» i ad udziełu ŭ lubych sprobach źviaržeńnia isnujučaha ładu i prezidenta. U siońniašnich umovach padobnyja dziejańni abjektyŭna ŭjaŭlajuć pahrozu dla niezaležnaści Biełarusi. Ułady mohuć pajści na lehalizacyju patryjatyčnych arhanizacyj, jakija nie buduć vystupać suprać ich i hatovyja razam pracavać dziela ŭmacavańnia dziaržavy.
Patryjoty i nacyjanalisty pavinny całkam admovicca ad padtrymki sił, jakija ŭłady ličać destruktyŭnymi, spynić pošuki sponsaraŭ za miežami krainy i pierastać być «ahientami ŭpłyvu» niebiełaruskich sił. Ułady ž mohuć vyzvalić z turmaŭ tych ludziej, jakich šmat chto ličyć palityčnymi viaźniami. Ale heta nielha rabić tak, jak było raniej — «ciškom», daŭšy mahčymaść apazicyi zajavić ab svajoj «pieramozie». Naadvarot, prezident moža jašče raz padkreślić svoj status miratvorca nie tolki ŭ zamiežnaj palitycy, ale i va ŭnutranaj, patłumačyŭšy simvalizm takoha kroku i jaho važnaść dla ŭmacavańnia ŭzajemnaha davieru ŭ hramadstvie».
Sajt 1863x.com źjaviŭsia jak adkaz na rasijski partał «Sputnik i pahrom». Za karotki čas, dziakujučy svajoj radykalnaści, 1863x.com nabraŭ vialikuju papularnaść siarod biełaruskich karystalnikaŭ internetu. Pa siońniašni dzień nieviadoma, chto mienavita staić za hetym sajtam.
