Upieršyniu ŭ Biełarusi praviedziena apieracyja pa transpłantacyi lohkaha, paviedamiŭ hałoŭny pazaštatny aniestezijołah-reanimatołah Ministerstva achovy zdaroŭja, kiraŭnik adździeła aniestezijałohii i reanimacyi RNPC «Transpłantacyi orhanaŭ i tkanak» Alaksandr Dziadźko 24 lutaha ŭ Minsku na naradzie pa vynikach pracy za 2014 hod.
Apieracyja prajšła 22 lutaha, stan pacyjentki stabilny. «Budziem spadziavacca, što da pośpiechaŭ (słužby aniestezijałohii i reanimacyi) dałučycca jašče transpłantacyja lohkich», – skazaŭ Dziadźko.
U Biełarusi pieršuju apieracyju pa transpłantacyi lohkaha płanavałasia pravieści ŭ druhoj pałovie 2013 hoda. U RNPC transpłantacyi orhanaŭ i tkanak stvorana śpiecyjalnaje adździaleńnie dla praviadzieńnia takich apieracyj, uračy prajšli stažyroŭku ŭ Aŭstryi. Sfarmiravany list čakańnia z pacyjentaŭ, jakija majuć patrebu ŭ apieracyi. U jaho ŭvachodziać bolš za 10 čałaviek.
Siarod pryčyn, jakija nie dazvolili pravieści pierasadku lohkaha raniej, Dziadźko nazvaŭ prablemy štučnaj vientylacyi lohkich donaraŭ. «U pracesie padrychtoŭki da amputacyi lohkaha (dla dalejšaha vykarystańnia ŭ jakaści donarskaha) my sutyknulisia z prablemaj, kali na praciahu hoda nie mahli zabrać jakasny orhan. Raptoŭna vyjaŭlajucca razryvy, jość traŭmy. Lohkija nie pryhodnyja dla pierasadki», — raskazaŭ śpiecyjalist.
U RNPC transpłantacyi orhanaŭ i tkanak vykonvajucca apieracyi pa pierasadcy piečani, nyrak, padstraŭnikavaj załozy. Kolkaść pierasadak orhanaŭ pavialičvajecca. Z momantu stvareńnia ŭ sakaviku 2010 i pa śniežań 2014 hoda tut vykanany 292 transpłantacyi piečani (u tym liku 37 dzieciam) i 74 — padstraŭnikavaj załozy.
Pavodle źviestak kamiteta pa achovie zdaroŭja Minharvykankama, u 2014 hodzie ŭ RNPC było praviedziena 70 pierasadak piečani (u 2013-m — 65, 2012-m — 52, 2011-m — 43, 2010-m — 32, 2009-m — 25, 2008-m — 9). Nyrka była pierasadžana 163 pacyjentam (u 2013-m — 190, 2012-m — 161, 2011-m — 160, 2010-m — 115, 2009-m — 100, 2008-m — 70, 2007-m — 40, 2006-m — 20).
