Prezident Rasii ŭpeŭnieny, što, niahledziačy na abiacańni ŭkrainskaha prezidenta Piatra Parašenki «viarnuć Krym», sapraŭdnaha vajennaha kanfliktu pamiž Kijevam i Maskvoj naŭrad ci varta čakać. «Dumaju, što taki apakaliptyčny scenar naŭrad ci mahčymy, i spadziajusia, što da hetaha nikoli nie dojdzie», - zajaviŭ prezident. Zajavy ab viartańni paŭvostrava jon nazvaŭ «revanšyzmam».

Jon paraiŭ uładam Ukrainy nie rabić papulisckija zajavy, a padumać ab tym, jak viarnuć krainu da narmalnaha žyćcia. «Naładzić ekanomiku, sacyjalnuju śfieru, naładzić adnosiny z paŭdniova-uschodam krainy … zabiaśpiečyć zakonnyja pravy i intaresy ludziej, jakija pražyvajuć u Danbasie», — raśpisaŭ karotkuju prahramu dziejańniaŭ prezident Rasii.

Takim čynam, Pucin pryznaje Danbas terytoryjaj Ukrainy, tady jak u 2014 hodzie jon prydumaŭ dla ich termin «Navarosija».

Pucin rastłumačyŭ, što ŭ spravie ŭrehulavańnia kanfliktu na ŭschodzie krainy uskładaje nadzieju na minskija pahadnieńnia, niekalki razoŭ zaklikaŭšy nie parušać ich. Jon u čarhovy raz abvierh infarmacyju ab prysutnaści rasijskich vojskaŭ na Danbasie, vykazaŭšy zdahadku, što ŭkrainskija siłaviki prosta sprabujuć apraŭdać parazu: «Kryŭdna prajhravać učorašnim šachcioram i traktarystam». Pucin asudziŭ «sproby raździmać kanflikt pamiž Rasijaj i Ukrainaj» i zapeŭniŭ, što situacyja budzie narmalizoŭvacca, kali prosta vykonvać zaklučanyja raniej damoŭlenaści. Jon padkreśliŭ, što minskija pahadnieńnia «zamacavany ŭ rezalucyi Rady Biaśpieki AAN i nabyli formu mižnarodna-pravavoha akta, padtrymanaha faktyčna ŭsioj mižnarodnaj supolnaściu».

Prezident Rasii vykazaŭ zdahadku, što partniory pa «minskich pieramovach» Mierkiel i Aland daviarajuć Rasii i naceleny na pošuk kampramisaŭ, choć i nie bačać pieramožnaj ŭ Kijevie, na dumku Pucina, nacysckaj ideałohii.

Akramia hetaha, Pucin abvierh zajavy, što jaho daradca Uładzisłaŭ Surkoŭ maje dačynieńnie da rasstrełu pratestoŭcaŭ na Majdanie ŭ lutym 2014 hoda. Jon nazvaŭ takija zajavy «poŭnaj łuchtoj». 

Клас
Панылы сорам
Ха-ха
Ого
Сумна
Абуральна