Pad śledstva trapiŭ syn adnaho z byłych kiraŭnikoŭ Administracyi prezidenta — Uładzimira Zamiatalina. Jak piša «Ježiednievnik», sprava na Dzianisa Zamiatalina była pačataja piać hadoŭ tamu, i ŭvieś hety čas jon znachodzicca pad vartaj. Tady ž ź jaho baćkam nie byŭ praciahnuty kantrakt na pasadzie hiendyrektara «Biełaruśfilma».

Razhlad spravy Dzianisa Zamiatalina i šaści jaho saŭdzielnikaŭ u sudzie Zavodskaha rajona pačaŭsia ŭletku 2014 hoda. A na minułym tydni prakuratura vystaviła padsudnym novaje abvinavačvańnie — u niezakonnaj pradprymalnickaj dziejnaści, jakuju viała arhanizavanaja hrupa. Im pahražaje da siami hadoŭ pazbaŭleńnia voli z kanfiskacyjaj majomaści.

Pavodle prakuratury, u 2008 hodzie Zamiatalin stvaryŭ z tavaryšam złačynnuju hrupu dla viadzieńnia niezakonnaj pradprymalnickaj dziejnaści, jakaja praisnavała da 2010 hoda.

Pa viersii dziaržabvinavaŭcy, Zamiatalin z saŭdzielnikami zajmalisia niezakonnymi finansavymi apieracyjami, afarmleńniem padroblenych dakumientaŭ, padačaj fiktyŭnaj padatkovaj spravazdačnaści. U nielehalnych schiemach byli zadziejničanyja firmy i indyvidualnyja pradprymalniki. Ahulnaja suma abarotu ŭsich strukturaŭ, pa viersii śledstva, pieravyšaje 100 młrd rubloŭ.

Sam Dzianis Zamiatalin całkam adprečvaje abvinavačvańni. Jon kaža, što piać z šaści inšych padsudnych jamu navat nie byli znajomyja.

Zamiatalin abviarhaje dokazy ŭ vyhladzie jaho pierapiski ŭ Skype. Pa jaho słovach, tekst padadzieny ŭ farmacie prahramy Excel, što supiarečyć techničnym ułaścivaściam prahramy. U paviedamleńniach, kaža jon, parušanaja chranałohija, ich kolkaść nie supadaje na roznych nośbitach. Śledčy, jaki pačynaŭ vieści spravu, naličyŭ u adnym z fajłaŭ staronak značna mienš, čym druhi, jaki praciahvaŭ śledstva. Bankaŭskija apieracyi, na jakija spasyłajecca prakuror, pravodzilisia bankam u toj čas, kali sam Dzianis Zamiatalin užo byŭ pad vartaj, a kampjutary byli apiačatanyja i znachodzilisia ŭ Departamiencie finansavych rasśledavańniaŭ Kamiteta dziaržkantrolu.

Darečy, śledčy, jaki pačynaŭ spravu Zamiatalina, ciapier sam znachodzicca pad śledstvam u Viciebsku. Jaho vinavaciać u chabarnictvie.

Baćka Dzianisa, Uładzimir Zamiatalin, zapomniŭsia jak adzin z samych adyjoznych kiraŭnikoŭ ideałohii, jaki razharnuŭ baraćbu z usim biełaruskim.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?