U 2006 hodzie eks-supracoŭnik rasijskich śpiecsłužbaŭ Alaksandr Litvinienka, mahčyma, sarvaŭ bujny ŭradavy kantrakt, jaki Maskva spadziavałasia zaklučyć z adnoj z zachodnich kampanij. Pra heta na adkrytych słuchańniach u Łondanie pra abstaviny śmierci Litvinienki zajaviŭ były kiraŭnik kampanii Titon Dzin Ećju, piša Bi-Bi-Si.

Čałaviekam, niepasredna zacikaŭlenym u padpisańni kantraktu, pa słovach Ećju, byŭ ciapierašni dyrektar Fiederalnaj słužby pa kantroli za abarotam narkotykaŭ Viktar Ivanoŭ. U 2006 hodzie jon byŭ pamočnikam Uładzimira Pucina.

Kampanija Dzina Ećju zajmałasia acenkaj ryzyk dla firmaŭ, jakija mieli namier pačać biźnies u Rasii. Niezadoŭha da svajoj hibieli Alaksandr Litvinienka pa jaho zamovie skłaŭ čatyry daśje, u tym liku — na bujnych rasijskich biźniesmienaŭ Jaŭhiena Tuhałukava i Kiryła Šubskaha, a taksama na tahačasnaha pamočnika prezidenta, ciapier pieršaha namieśnika staršyni rasijskaha ŭrada Ihara Šuvałava.

Ale ŭvahu ŭdzielnikaŭ słuchańniaŭ pryciahnuła daśje na Viktara Ivanova, jakoje ŭtrymlivaje kampramietujučuju infarmacyju na hetaha vysokapastaŭlenaha rasijskaha čynoŭnika, jaki mieŭ pramy dostup da prezidenta. Jak skazaŭ Dzin Ećju, jakaść padrychtavanaha materyjału była cudoŭnaj.

Leninhradskaje minułaje

Praŭda, takuju vysokuju acenku Alaksandr Litvinienka zasłužyŭ tolki z druhoj sproby. Jaho pieršaje daśje na Viktara Ivanova było filkinaj hramataj pamieram u tracinu sšytkavaha arkuša, raspavioŭ Ećju. Jaho padrychtavaŭ dla Litvinienki nie chto inšy, jak jaho znajomy Andrej Łuhavoj.

Paśla taho jak Dzin Ećju daŭ zrazumieć, što čakaŭ bolš padrabiaznaj pracy, Litvinienku pryjšłosia šukać novuju krynicu, i na hety raz vynik byŭ uražlivym. Aŭtaram novaha daśje byŭ były pałkoŭnik KDB Juryj Šviec.

Udzielnikam słuchańniaŭ u Vysokim sudzie Łondana byli pradstaŭleny niekatoryja staronki spravazdačy, jakija źmiaščali nadzvyčaj padrabiaznuju psichałahičnuju i prafiesijnuju charaktarystyku byłoha supracoŭnika Upraŭleńnia KDB pa Leninhradskaj vobłaści Viktara Ivanova.

Jak havorycca ŭ spravazdačy, Ivanoŭ pracavaŭ u leninhradskim UKDB ŭ hady, kali Uładzimir Pucin byŭ staršynioj kamiteta meryi pa źniešnich suviaziach.

Jak paviedamlajecca ŭ daśje, Viktar Ivanoŭ vialikuju častku času pravioŭ u adździele kadraŭ UKDB, jakija słužyli ssyłkaj dla nieprydatnych da apieratyŭnaj pracy supracoŭnikaŭ. Apieratyŭniki stavilisia da kadravikoŭ z pahardaj, a kadraviki źbirali na apieratyŭnikaŭ kampramat i buryli ich karjery - tak Juryj Šviec apisvaje tahačasnyja noravy ŭnutry leninhradskaha UKDB.

Žyćciovaja fiłasofija Viktara Ivanova, zhodna z hetym daśje, hruntavałasia na dvuch pryncypach: «Maje prava toj, u kaho bolš pravoŭ» i «Inicyjatyva nie zastajecca biez pakarańnia». Aŭtar spravazdačy, u pryvatnaści, adznačaje, što Ivanoŭ pakutavaŭ «łatentnym kompleksam niepaŭnavartasnaści», uśviedamlajučy, što asablivym intelektam nie vyznačajecca. Hety niedachop jon kampiensavaŭ vybitnaj zdolnaściu da vizantyjskich biurakratyčnyŭ intryhaŭ.

«Tamboŭski»

Ale niepryvabny psichałahičny partret nie byŭ hałoŭnym kampramatam daśje. Kudy bolš surjoznym było śćviardžeńnie ab tym, što, pracujučy ŭ KDB, Viktar Ivanoŭ mieŭ niezakonny biznes, u tym liku źviazany z naftaj i marskim portam, i supracoŭničaŭ ź lidaram tamboŭskaj złačynnaj hrupoŭki Uładzimiram Kumarynym.

Tamboŭskaja AZH, najmahutnaja ŭ tyja hady ŭ Sankt-Pieciarburhu, jak śćviardžajecca ŭ daśje, sapraŭdy zajmałasia kantrabandaj, i Kumaryn zmahaŭsia za kantrol nad sankt-pieciarburhskim marskim portam. Viktar Ivanoŭ, śćviardžajecca ŭ daśje, mieŭ tam svoj intares.

«Nie ŭdajučysia ŭ detali hetaj spravazdačy, da jakich my, jak skazaŭ staršynia suda, jašče dojdziem, ci sapraŭdy sutnaść spravazdačy była ŭ tym, što hety čałaviek naležaŭ da arhanizavanaj złačynnaj hrupy, jaki moh zabić, kali adčuŭ niebiaśpieku?», — spytaŭ advakat Maryi Litvinienki Ben Emiersan śviedku Dzina Ećju.

«Tak,» - adkazaŭ śviedka.

Praz šmat hadoŭ, u 2006 hodzie, jak piša aŭtar daśje, dva pamočniki Uładzimira Pucina - Viktar Ivanoŭ i Ihar Šuvałaŭ - byli pravaj i levaj rukoj rasijskaha prezidenta. Kali treba było vyrašyć jakoje-niebudź pytańnie na asnovie kampramisu, sprava daručałasia Šuvałavu, a kali byli nieabchodnyja žorstkija miery, pytańnie vyrašaŭ Ivanoŭ. Tak Juryj Šviec apisvaje raźmierkavańnie rolaŭ pamiž dvuma hetymi nadzvyčaj upłyvovymi i blizkimi u toj čas da Pucina čynoŭnikami prezidenckaj administracyi.

Клас
Панылы сорам
Ха-ха
Ого
Сумна
Абуральна