«Pabočnym praduktam pieramovaŭ u Minsku stała, prynamsi, časovaja reabilitacyja biełaruskaha lidara Alaksandra Łukašenki», — piša infarmacyjnaje ahienctva Rojterz. Raniej Łukašenka zrabiŭ siabie paryjaj dla mižnarodnaj supolnaści, ale ciapier raniejšy imidž zasłaniŭsia jahonaj rollu miratvorcy.
Anhieła Mierkiel i Fransua Aland pazujuć dla fotohrafaŭ paśla 16-hadzinnych načnych pieramovaŭ. Fota Rojterz.
Ahienctva sabrała krajnie cikavyja detali z-za kulis adnych z samych ciažkich pieramovaŭ u historyi čałaviectva.
— Parašenka z samaha pačatku pavodziŭ siabie jak čałaviek, jaki śpiašajecca. Pamočnik skazaŭ, što jon spaźniŭsia na samalot da Minska, i, apynuŭšysia na borcie, pryśpiešyŭ: «Davajcie chutčej uźlatać, my spaźniajemsia!»
— Łukašenka padaryŭ Mierkiel nievialiki bukiet kvietak. Heta byŭ pieršy vizit zachodnich lidaraŭ u Biełaruś za doŭhija hady. Praz 17 hadzin jany raźvitvalisia ź vielmi zadavolenym vyhladam.
— Parašenka paćvierdziŭ svaju reputacyju čałaviečnaha lidara. Kali Parašenka prybyŭ u Pałac, na jaho litaralna nakinuŭsia natoŭp žurnalistaŭ. Słužba biaśpieki sprabavała adciaśnić ich, i adzin z apierataraŭ upaŭ. Ukrainski lidar dapamoh jamu ŭstać sa słovami: «Prabačcie, kali łaska»
— Pierad pačatkam pieramovaŭ pamočniki dastavali naściennuju kartu Ukrainy. Adzin ź ich skazaŭ druhomu: «Nie, nie hetuju. Vuń tuju».
— U pieršyja hadziny Mierkiel i Ałand, vidać, sprabavali zrabić usio, kab Parašenka i Pucin pačali choć niejak razmaŭlać. Spačatku jany biehali pa Pałacy ŭ pošukach Pucina. Potym viarnulisia da Parašenki, a Pucin paźniej dałučyŭsia da ich.
— «Na pieramovach u Minsku pajšła «baraćba niervaŭ», — napisaŭ pamočnik Parašenki Valeryj Čały na Facebook kala 4-j ranicy.
— Aficyjantki snavali ŭ pierahavornyja zały i nazad z vazkami, jakija łamilisia ad sałataŭ, sadaviny, butelek vady. Paźniej Łukašenka z honaram padkreśliŭ biełaruskuju haścinnaść: «Jeli jaječniu, syr, małočnyja pradukty, vypili niekalki viodraŭ kavy».
— Parašenka časta vychodziŭ u bakavy pakoj, kab daviedacca pra naviny ad svajho hienštaba. Adzin jon raz vyjšaŭ adtul u vidavočnym hnievie. Adkazvajučy na pytańnie, ci budzie padpisana pahadnieńnie, jon pracadziŭ skroź ścisnutyja zuby: «Pabačym».
— Kala paŭnočy ŭkrainskaja presa atrymała vyrazny sihnał, što pieramovy pravalilisia. Im skazali sabracca i čakać la ŭvachodu, kab jechać na terminovy bryfinh Parašenki. Praz prykładna paŭhadziny ich paprasili viarnucca ŭ kanfierenc-zału.
— Žurnalisty sprabavali padsłuchać razmovy lidaraŭ, kali tyja vychodzili ź pieramoŭnaj. «Ciažka. Jon viadzie niesumlennuju i brudnuju hulniu», — kaža Parašenka. «Ja viedaju… A ŭsie heta zrazumieli», — adkazvaje Łukašenka. Parašenka dadaje: «Jon ŭsiudy jaje viadzie».
— Ministr zamiežnych spraŭ Rasii Siarhiej Łaŭroŭ na hety raz akazaŭsia amal nie pry spravie, ale ŭsiu noč byŭ u humory i žartavaŭ: «Nas paklikali pajeści sała».
— Ministr zamiežnych spraŭ Ukrainy Pavieł Klimkin u piatnicu abjaviŭ u kijeŭskim parłamiencie: «Niekalki razoŭ padčas pieramovaŭ było žadańnie i ŭ nas, i ŭ našych kaleh z Hiermanii i Francyi spynić pieramovy».
— «Ałand i Mierkiel čaściej byli ŭ roli słuchačoŭ, pasrednikaŭ, — skazała krynica ŭ francuzskaj delehacyi. — Dla Parašenki i ŭkraincaŭ heta było bolš baluča, uličvajučy situacyju, adnak Pucin i Parašenka nie majuć asabistaj varožaści».
