Ułady nie majuć namieru praciahvać dla indyvidualnych pradprymalnikaŭ (IP) termin rasprodažu tavaraŭ lehprama bieź siertyfikacyi pavodle techrehłamientu Mytnaha sajuza (MS) paśla 1 sakavika.
vk.com
Pra heta paviedamiŭ staršynia RHA «Pierśpiektyva» Anatol Šumčanka 13 lutaha paśla sustrečy z kiraŭnictvam departamienta pa pradprymalnictvie pry Minekanomiki i novym namieśnikam ministra ekanomiki Irynaj Kaścievič.
Nahadajem, z 1 lipienia minułaha hoda ŭ Biełarusi dziejničaje ŭkaz prezidenta № 222 «Ab rehulavańni pradprymalnickaj dziejnaści i realizacyi tavaraŭ indyvidualnymi pradprymalnikami i inšymi fizičnymi asobami», pryniaty ŭ padtrymku techrehłamientu MS «Ab biaśpiecy pradukcyi lohkaj pramysłovaści». Ukaz abaviazaŭ IP mieć siertyfikaty i dakumienty na ŭsie ŭviezienyja ŭ Biełaruś tavary, ale reštki tavaraŭ, uviezienych da taho, jak nabyŭ moc dakumient, dazvolena było pradavać pavodle starych praviłaŭ da 1 sakavika 2015 hoda.
Indyvidualnyja pradprymalniki zajaŭlajuć, što nie zmohuć pracavać zhodna z novymi praviłami, bo atrymać usie nieabchodnyja dakumienty ŭ pastaŭščykoŭ (hałoŭnym čynam rasijskich) praktyčna niemahčyma.
Siońniašniaja sustreča ŭ departamiencie pa pradprymalnictvie Minekanomiki prajšła napiaredadni forumu pradprymalnikaŭ, jaki «Pierśpiektyva» pravodzić 16 lutaha ŭ staličnym hateli «Biełaruś». Adnym z klučavych pytańniaŭ forumu stanie abmierkavańnie prablemy, vyklikanaj ukazam № 222.
Pavodle słoŭ Šumčanki, Iryna Kaścievič paviedamiła, što paśla razhladu hetaha pytańnia orhany ŭłady pryjšli da rašeńnia nie praciahvać dla IP termin rasprodažu reštaŭ tavaraŭ i nie ŭnosić adpaviednyja źmieny ŭ prezidencki ŭkaz. «Maŭlaŭ, usie pavinny navučycca žyć i pracavać u novych umovach, — skazaŭ lidar pradprymalnickaha abjadnańnia. — Heta značyć, z 1 sakavika na ŭvieś tavar, jaki jość u pradprymalnikaŭ, pavinny być dakumienty, siertyfikaty. Hruba kažučy, heta prysud, jaki abskardžańniu nie padlahaje. Ale pry hetym było zajaŭlena, što čynoŭniki hatovyja ŭ dalejšym vieści z pradprymalnikami dyjałoh».
Tak, pavodle słoŭ Šumčanki, troje pradstaŭnikoŭ departamienta pa pradprymalnictvie, u tym liku dyrektar i jaho namieśnik, płanujuć pryjści na forum 16 lutaha. Mierapryjemstva taksama źbirajucca naviedać pradstaŭniki Ministerstva pa padatkach i zborach, Minhandlu, Dziaržkamiteta pa standartyzacyi i Dziaržkammajomaści.
«My skazali, što 16 lutaha ŭ čynoŭnikaŭ budzie vydatnaja mahčymaść vysłuchać inšy punkt hledžańnia adnosna terminaŭ prodažu reštkaŭ. My taksama papiaredzili, što ličym ich rašeńnie pamyłkovym, što ŭsia adkaznaść za nastupstvy budzie lažać na ich», — dadaŭ lidar «Pierśpiektyvy».
Varta adznačyć, što na pres-kanfierencyi ŭ kancy studzienia namieśnik ministra handlu Iryna Narkievič zajaŭlała pra mahčymaść praciahu terminu rasprodažu IP reštkaŭ tavaraŭ lehprama bieź siertyfikataŭ. Pavodle jaje słoŭ, inicyjatyva zychodziła ź Ministerstva ekanomiki, jakoje prapanavała try varyjanty pieranosu — da 31 śniežnia 2015 hoda, da 1 krasavika 2016-ha i da poŭnaha rasprodažu.
Na dumku Šumčanki, admova ad praciahu terminu realizacyi niesiertyfikavanych reštkaŭ śviedčyć ab tym, što «ŭ krainie znajšlisia čynoŭniki, jakija dumajuć, što jany dobra kantralujuć situacyju ŭ ekanomicy, što jany mohuć spakojna vyjści ź siońniašniaha stanovišča».
«My nieadnarazova ad ich čuli, što IP, maŭlaŭ, mała pryŭnosiać u ekanomiku Biełarusi, — skazaŭ jon. — Hetyja čynoŭniki prymajuć takija «adkaznyja» rašeńni, jakija mohuć pryvieści da źniščeńnia małoha biźniesu za ličanyja miesiacy. Dobra, niachaj hetyja čynoŭniki i adkažuć potym za situacyju, jakaja składziecca paśla 1 sakavika ŭ hetym biźniesie».
«Paŭpustyja handlovyja centry i rynki vielmi dobra ŭpryhožać piejzaž našaj ekanamičnaj stabilnaści i situacyi ŭ krainie ŭ cełym», — padahulniŭ lidar «Pierśpiektyvy».
Na pasiadžeńni kalehii Minhandlu 13 lutaha ministr handlu Valancinaŭ Čakanaŭ paćvierdziŭ, što terminy realizacyi IP niesiertyfikavanych reštkaŭ pradukcyi praciahvacca nie buduć. «Inakš terminy buduć praciahvacca biaskonca», — zajaviŭ čynoŭnik.
