My pryvykli da kart na płoskich pavierchniach i daviarajem im nie mieniej, čym hłobusam. U peŭnych maštabach heta pravilna — Minsk, a to i cełuju Biełaruś možna pryniać za płoskaść, vialikich pamyłak nie budzie. Ale ŭ maštabach karty cełaj płaniety śćviardžać, što Ziamla płoskaja, nielha.
Lubaja prajekcyja pavierchni šara na płoskaść daje pamyłki.
Niemahčyma pačyścić apielsin i raskłaści na stale cedru daskanała roŭnaj płoskaściu. Taksama niemahčyma i pakazać na płoskaści terytoryju, naprykład, Rasii, nie «parezaŭšy» jaje na biaskonca maleńkija pałoski.
My zvykli da raŭnavuhłavych prajekcyj, dzie paraleli i mierydyjany pierasiakajucca raŭniutka pad vuhłom 90°. Adna z samych viadomych — prajekcyja Mierkatara.
Prajekcyja Mierkatara
Tolki ŭ ich čym dalej da palusoŭ, tym bolej pamyłak. Napraŭdu, Hrenłandyja zusim nie takaja vialikaja — jana prosta nadta daloka ad ekvataru!
Partał Buzzfeed apublikavaŭ videa, dzie tłumačyć realny pamier krain na kartach:
Nie takija i maleńkija tyja Štaty, usiaho ŭ 2,1 razy mieniej za Rasiju!
A Hrenłandyja, jakuju my zvykli bačyć u paraŭnalnych z Afrykaj pamierach, nasamreč u 14 razoŭ mienšaja za Čorny kantynient!
Zmahajucca z takimi pamyłkami pa-roznamu.
Časam atrymlivajecca sardečka — jak u prajekcyi Vierniera. Adlehłaści pa paralelach i pa cantralnym mierydyjanie pravilnyja, ale jak ža pluščyć Aŭstrałiju!
Prajekcyja Vierniera
Časam vychodzić chvastaty sabačka — jak u prajekcyi Dymaksijona. U pryncypie, płoščy kantynientaŭ blizkija da viernych, a kali kartu vyrazać i skłaści, atrymajecca svojeasablivaja bibłijateka, amal šaryk. Tolki kali hladzieć na jaje płoskuju, šyju možna źviarnuć.
Prajekcyja Dymaksijona
Chiba nie ŭsie mahčymyja prajekcyi ź ironijaj apisanyja pa-anhlijsku tut. A pakrucić hłobus na ekranie kampjutara ci smartfona možna z dapamohaj Google Earth.
Jašče adzin zman, u jaki možna samoha siabie ŭvieści ad luboj karty i navat hłobusa — nasielnictva krain śvietu.
Kali pahladzieć na Kanadu navat u «pravilnych» prajekcyjach, moža padacca, što tam žyvie mnoha-mnoha ludziej. A kali na Filipiny — što tam źmieścicca nie bolš ludziej, čym u Biełarusi.
Heta moža vypravić karta, što pakazvaje płošču krain praparcyjna ščylnaści nasielnictva. Na karcie ad TeaDranks (hladzieć u zvyšvialikim razroźnieńni) u kožnaj kletcy źmiaščajucca pryblizna 500 tysiač čałaviek.
Karta roŭnaj ščylnaści nasielnictva TeaDranks
A tak (hladzieć u zvyšvialikim razroźnieńni) vyhladaŭ by śviet na hetaj karcie, kali b uličvalisia tolki padłučanyja da internetu ludzi. Nie viercie karyčnievamu koleru Biełarusi, u nas u lidarach siońnia ŭžo nie «UKantakcie», a Google!
Karta roŭnaj ščylnaści karystalnikaŭ internetu
