Prezident Jeŭrapiejskaha banka rekanstrukcyi i raźvićcia (JEBRR) Suma Čakrabarci naviedaje Minsk 17—18 lutaha. Heta budzie pieršy vizit kiraŭnika JEBRR u Biełaruś.
Jak paviedamiŭ staršy savietnik banka Anton Usaŭ, zapłanavanyja sustrečy Sumy Čakrabarci z kiraŭnikom dziaržavy Alaksandram Łukašenkam, premjer-ministram Andrejem Kabiakovym, ministrami ekanomiki i zamiežnych spraŭ.
Pavodle słoŭ Usava, padčas vizitu buduć abmiarkoŭvacca pytańni mahčymaha pašyreńnia supracoŭnictva Biełarusi i JEBRR. Aprača taho, Suma Čakrabarci płanuje naviedać zavod pa vytvorčaści ruchomaha sastavu kampanii «Štadler» u Fanipali — hety prajekt realizujecca pry ŭdziele JEBRR.
U prezidenta Jeŭrapiejskaha banka rekanstrukcyi i raźvićcia taksama zapłanavanyja sustrečy z pradstaŭnikami niaŭradavych arhanizacyj i dypłamatyčnaha korpusa.
Jeŭrapiejski bank rekanstrukcyi i raźvićcia — mižnarodnaja finansavaja arhanizacyja sa štab-kvateraj u Łondanie, stvoranaja dla padtrymki transfarmacyi ekanomiki ŭ dziaržavach Centralnaj i Uschodniaj Jeŭropy. JEBRR pačaŭ dziejničać u krasaviku 1991 hoda.
Asnoŭnyja akcyjaniery banka — ZŠA, krainy Jeŭrapiejskaha sajuza, Japonija. Biełaruś źjaŭlajecca paŭnapraŭnym členam JEBRR z 1992 hoda. Z 1994 hoda ŭ krainie adkrytaje pastajannaje pradstaŭnictva banka. 31 sakavika 2014 hoda adbyłosia aficyjnaje adkryćcio novaha ofisa banka ŭ Minsku.
Za čas svajoj dziejnaści ŭ Biełarusi JEBRR braŭ udzieł u realizacyi 66 prajektaŭ. Sumarny abjom pryciahnutych inviestycyj aceńvajecca ŭ 1 młrd 502,4 młn. jeŭra.
Resursy JEBRR, što vydzialajucca Biełarusi, nakiroŭvajucca na raźvićcio małoha i siaredniaha biźniesu. U 2014 hodzie JEBRR raźličvaŭ ukłaści ŭ ekanomiku Biełarusi prykładna 220 młn. jeŭra.
Apošnim časam sumiesna ź JEBRR u Biełarusi pačatyja niekalki znakavych inviestycyjnych prajektaŭ u śfiery drevaapracoŭki (zavod «Kronaspan»), vytvorčaści napojaŭ (pivavarni «Chajniekien») i ruchomaha sastavu (AAT «Štadler Minsk»).
Chod i pierśpiektyvy ažyćciaŭleńnia Stratehii JEBRR dla Respubliki Biełaruś, realizacyja najaŭnych i novych inviestycyjnych prajektaŭ byli abmierkavanyja ŭ miežach kansultatyŭnaha vizitu ŭ Minsk pradstaŭnikoŭ savieta dyrektaraŭ JEBRR, jaki prajšoŭ 22—26 vieraśnia 2014 hoda.
