U Rastoŭskaj vobłaści napiaredadni zatrymali traich čałaviek, jakija prarvalisia praź miažu na Kamazie, a paśla zatrymańnia nazvali siabie «apałčencami».
Nadzvyčajnaje zdareńnie adbyłosia ŭ rajonie pahraničnych punktaŭ «Izvaryna» (Ukraina) i «Danieck» (Rasija). Kiroŭca hruzavika źnios zaharodžu na abodvuch punktach i nie spyniŭsia na patrabavańni pamiežnikaŭ.
Rastoŭski sajt 161.ru sa spasyłkaj na Danskoje pahranupraŭleńnie FSB pieradaje, što paśla hetaha pačałasia pahonia. U joj brali ŭdzieł bajcy AMAPa i supracoŭniki adździaleńnia mabilnych dziejańniaŭ PU FSB Rasii pa Rastoŭskaj vobłaści.
Siłaviki adkryli ahoń pa kołach hruzavika, ale spynić jaho ŭdałosia tolki la chutara Vałčenskaha, zastupiŭšy šlach inšym KamAZam.
«Troje zatrymanych znachodzilisia ŭ stanie najmacniejšaha apjanieńnia, naŭrad ci ałkaholnaha. Nazvali siabie apałčencami. Jany doŭha nie mahli zrazumieć, što adbyvajecca i na terytoryi jakoj dziaržavy znachodziacca», — paviedamiŭ udzielnik apieracyi pa zatrymańni. Taksama jon paviedamiŭ, što adzin z zatrymanych paźniej źmianiŭ pakazańni, raptam zajaviŭšy, što źjaŭlajecca zakładnikam: «My pieršy raz bačyli ŭzbrojenaha da zuboŭ zakładnika. «Apałčency» heta ci pravakatary, raźbiarucca pravaachoŭnyja orhany».
Hramadzianami jakoj krainy źjaŭlajucca zatrymanyja, u paviedamleńni nie ŭdakładniajecca.
