Pra heta ŭ intervju charter97.org zajaviŭ sustaršynia «Maładoha frontu» i były palitviazień Źmicier Daškievič, kamientujučy inicyjatyvu vyłučeńnia Mikałaja Statkieviča ŭ jakaści adzinaha kandydata na prezidenckija vybary 2015 hoda. Palityk nazvaŭ hety krok najbolš zrazumiełym i łahičnym dla demakratyčnych siłaŭ Biełarusi.
«Dla mianie absalutna vidavočna, što patrabavańnie vyzvaleńnia palitviaźniaŭ pavinna stajać pieršym punktam dla apazicyi, — skazaŭ Źmicier Daškievič. — Bieź jaho vykanańnia jana nie maje maralnaha prava brać udzieł u luboj kampanii, tym bolš u prezidenckich vybarach. Vyłučeńnie Mikałaja Statkieviča adzinym kandydatam — samaja prymalnaja, zrazumiełaja, jasnaja i łahičnaja stratehija z tych, jakija mohuć być. Kali chto-niebudź zajaŭlaje ab tym, što jana nierealnaja (pra heta ŭžo napisali niekatoryja palitołahi), to mahu adkazać, što jana nie mienš realnaja, čym vyłučeńnie luboha biełaruskaha palityka ŭ jakaści kandydata ŭ prezidenty krainy. Bolš za toje, hetaja stratehija najbolš zrazumiełaja hramadstvu: nielha pravodzić prezidenckija vybary ŭ toj čas, jak adzin z udzielnikaŭ papiaredniaj kampanii, jakaja prajšła piać hadoŭ tamu, dahetul znachodzicca za kratami.
Ja ŭpeŭnieny, što kali demakraty pamiž saboj damoviacca chacia b u hetym pytańni i vyłučać Mikałaja Statkieviča ŭ jakaści adzinaha kandydata, to jon vyjdzie na volu ŭžo bližejšym časam. Zarehistrujuć jaho ŭ jakaści kandydata ci nie — heta ŭžo bolš składanaje pytańnie, tak jak Alaksandr Łukašenka razumieje, što heta mocny z maralnaha punktu hledžańnia praciŭnik. Ale ŭłady vymušanyja buduć vyzvalić Mikałaja Statkieviča i inšych palitviaźniaŭ».
Kali ž Statkieviča nie zarehistrujuć, to ŭdzielničać u hetych vybarach nielha. U situacyi najaŭnaści ŭ Biełarusi palitviaźniaŭ adzinaj formaj udziełu ŭ vybarčaj kampanii moža być tolki bajkot — absalutna jasny z punktu hledžańnia marali adkaz režymu. U inšym vypadku apazicyja kančatkova stracić svoj aŭtarytet u biełaruskim hramadstvie, miarkuje lidar «Maładoha Frontu».
