Vialiki vybuch. Vyjava: universetoday.com
Adnu z hałoŭnych prablem historyi Suśvietu, sinhularnaść napiaredadni Vialikaha vybuchu, moža być vyrašanaja, śćviardžajuć aŭtary daśledavańnia, apublikavanaha ŭ časopisie Physics Letters B.
Z Ahulnaj teoryi relatyŭnaści vynikaje, što ŭ viadomaha nam śvietu byŭ pačatak kala 13,8 młrd hod tamu. Adbyŭsia Vialiki vybuch — materyja, što sfarmavała siońnia hałaktyki, zorki i płaniety, pačała raźlatacca pa ŭsich napramkach i praciahvaje raźlatacca siońnia.
Prablema teoryi Vialikaha vybuchu ŭ tym, što jana nie tłumačyć, što było da Vialikaha vybuchu i čamu jon adbyŭsia.
Da Vialikaha vybuchu ŭvieś suśviet byŭ ścisnuty ŭ kropku — nastolki maleńkuju i nastolki ščylnuju, što ŭ joj nie dziejničali nijakija zakony fiziki. Hety stan nazyvajecca sinhularnaściu. Praličyć, što było padčas jaje, a tym bolej da jaje, ličycca niemahčymym.
Vyrašeńnie prablemy sinhularnaści prapanavali Achmied Farah Ali ź Jehiptu i kanadziec Sauryja Das. Jany dadali raniej nie ŭžyvanyja kvantavyja papravačnyja składniki da Ahulnaj teoryi relatyŭnaści Ejnštejna.
Navukoŭcy ŭžyli napracoŭki fizika-tearetyka Devida Boma, jaki ŭ 50-ch vyvučaŭ zamienu kłasičnych hieadezičnych linij (najkaraciejšych adlehłaściej miž punktami na śfieryčnaj pavierchni) na kvantavyja trajektoryi. Pierad vialikim vybucham kłasičnyja hieadezičnyja linii pierasiakajucca ŭ punktach-sinhularnaściach — u kvantavych trajektoryj takich pierasiačeńniaŭ nie ŭźnikaje.
Takija papraŭki ŭtrymlivajuć suśviet u kaniečnych pamierach, a značyć, i robiać jaho biaskoncym u časie.
Novaja teoryja apisvaje suśviet napoŭnienym kvantavaj vadkaściu, što moža składacca z hravitonaŭ (hipatetyčnych čaścinak biez masy, jakija zabiaśpiečvajuć hravitacyjnyja ŭzajemadziejańni). Taksama kvantavyja papraŭki teoryi pazbaŭlajuć suśviet ciomnaj enierhii (ź jakoj, jak miarkujecca siońnia, Suśviet składajecca na try čverci) i dobra ŭzhadniajucca ź viadomymi siońnia kasmałahičnaj kanstantaj i ščylnaściu suśvietu.
