kremlin.ru
Ułady Biełarusi zapytali va ŭrada Rasii finansavuju padtrymku na 2015 hod pamieram 2,5 młrd dalaraŭ.
Pra heta raspaviali partału TUT.BY niekalki infarmavanych krynic.
«Ciapier abmiarkoŭvajecca mahčymaść roznych formaŭ [finansavaj] dapamohi z boku ŭrada Rasii. Heta mohuć być jak kredyty ad urada RF, tak i bujnych rasijskich dziaržbankaŭ. Ahułam padtrymka moža skłaści 2,5 młrd dalaraŭ», — raspavioŭ surazmoŭca.
«Plus da ŭsiaho biełaruskija pradpryjemstvy mohuć atrymać istotnyja pryvilei pa dostupie na rasijski rynak. Siońnia, niahledziačy na dekłaravanuju adzinuju ekanamičnuju prastoru, isnujuć peŭnyja barjery nakont dostupu na rynak RF», — dadaŭ jon.
Pavodle haziety «Biełorusy i rynok», «havorka idzie pra doŭhija i karotkija hrošy, ahulnaja zajaŭlenaja suma pieravyšaje 2 młrd dalaraŭ».
Krynica paviedamiła, što ŭ ciapierašni čas urad Biełarusi rychtuje prahramu sumiesnych z Rasijaj antykryzisnych mier pa pieraadoleńni prablem u ekanomicy. Finalnuju viersiju płanujecca razhledzieć i ŭzhadnić na pasiadžeńni Vyšejšaj dziaržrady Sajuznaj dziaržavy Biełarusi i Rasii 3 sakavika.
Ab mahčymaj finansavaj padtrymcy z boku Rasii havaryŭ na vialikaj pres-kanfierencyi 29 studzienia Alaksandr Łukašenka. «Nam nie chaciełasia b jašče kredytaŭ. Ale ja maju ćviordyja damoŭlenaści z prezidentam i premjer-ministram [Rasii], kali nam budzie vielmi ciažka, to Rasieja plačo padstavić», — zapeŭniŭ kiraŭnik dziaržavy, dadaŭšy, što biełaruskaja ekanomika źjaŭlajecca siońnia «častkaj rasijskaj ekanomiki».
Nieŭzabavie ministr finansaŭ RF Anton Siłuanaŭ paćvierdziŭ, što Rasija ŭ vypadku krajniaj nieabchodnaści razhledzić mahčymaść pradastaŭleńnia finansavaj dapamohi Biełarusi, ekanomika jakoj «ciesna źviazana» z rasijskaj.
«Zaraz my vyvučajem situacyju razam z našymi biełaruskimi kalehami. My analizujem ŭsie faktary, jakija akazvajuć ŭździejańnie na ekanamičnuju situacyju ŭ abiedźviuch krainach, u pryvatnaści, sankcyi i padzieńnie koštaŭ na naftu. U ciapierašni čas my viadziem pieramovy», — adznačyŭ Siłuanaŭ.
Biełarusi ŭ hetym hodzie nieabchodna vypłacić kala 4 młrd dalaraŭ pa źniešnich abaviazacielstvach.
Pry hetym zołatavalutnyja reziervy krainy praciahvajuć rastavać. Za studzień jany usochli jašče na 335 młn dalaraŭ — da 4,7 młrd dalaraŭ.
U Minfinie Biełarusi admovilisia ad kamientaroŭ.
