Biez žartaŭ — u vas budzie realnaja mahčymaść vypić u kampanii Betmena, Darta Vejdara ci Supiermena ŭ sapraŭdnym bary, jaki niejkim fantastyčnym (a jakim ž jašče!) čynam byŭ pieraniesieny ŭ «Čyžoŭku-Arenu» ź nieviadomaj addalenaj hałaktyki. Arhanizujuć hety i inšyja cudy, jakija adbuducca ŭ Minsku viasnoj, biełaruskija amatary fantastyčnaha i fentezijnaha kino, knih, komiksaŭ i sieryjałaŭ — ad «Zornych vojnaŭ» da «Hulni prastołaŭ».
Jaskravaje i maštabnaje mierapryjemstva ładzicca ŭ stalicy ŭžo nie pieršy hod, i z kožnym hodam raście kolkasna i jakasna, pierajazdžaje na ŭsio bolš prastornyja placoŭki, tamu my parazmaŭlali ź niekatorymi arhanizatarami Universe Convention-2015 (UniCon, JuniKon) za kubkam kvasu.
— My namahajemsia zrabić tak, kab kožny, chto zacikavicca i zojdzie, moh daviedacca dla siabie niešta novaje. Zaŭsiody navičkam tut raspaviaduć i padkažuć. Ale, kaniešnie, tyja, chto ŭžo razumieje, pra što razmova i idzie metanakiravana na niejki stend, u niejki fendom, tyja znojduć dla siabie jašče bolš, — kaža hienieralny pradziusar festu Pavał Čabaj.
Fanaty arhanizujuć za 2 dni festu mnostva vialikich i małych konkursaŭ, viktaryn, hulniaŭ, vystupaŭ i inšych sposabaŭ pabavić čas, ale asnoŭnaje — heta stendy, jakija stvarajucca ŭłasnaručna samimi prychilnikami taho ci inšaha fantastyčnaha suśvietu.
Kožny stend — heta svojeasablivaja prezientacyja taho ci inšaha fantastyčnaha tvora ci suśvietu, a taksama placoŭka dla mierapryjemstvaŭ i mahčymaść paznajomicca z bolš šyrokim śpiektram fantastyki.
— Ludzi, jakija rychtujuć stendy, hatovyja da ŭzajemadziejańnia z novymi ludźmi, kožnaja hrupa rychtuje svaju prahramu, takim čynam zaachvočvajučy ludziej, i zaŭsiody jość kamu adkazać na pytańni. Hetak paśla JuniKona 2013 hoda vialikaja kolkaść ludziej pahladzieła «Doktara Chto», zacikaviłasia hetym sieryjałam, — raspaviała kaardynatarka Viktoryja Mazanik.
Kala adnych stendaŭ možna budzie daviedacca pra historyju vojnaŭ elfaŭ i orkaŭ, kala inšych — pra sapraŭdnych robataŭ, jakija pracujuć u kosmasie. Amatary kampjutarnych hulniaŭ prapanujuć pahulać vam u kłasičnyja 8-bitnyja chity vašaha dziacinstva (kali tady vy ŭžo naradzilisia), a ŭ inšych miescach možna budzie pasprabavać siabie ŭ nastolnych hulniach.
Fanaty «Zornych vojnaŭ» u minułym hodzie arhanizoŭvali dvuboi na śvietłavych miačach!
Nieadjemnaj i ci nie samaj zaŭvažnaj častkaj prahramy JuniKona źjaŭlajecca t.zv. kaspłej (ad anhielskaha costume play) — pieraŭtvareńnie fanataŭ u hierojaŭ fantastyčnych tvoraŭ, što prynosić šmat radaści i samim fanatam, i dzieciam, jakija časta lubiać fatahrafavacca z žyvymi hierojami svaich lubimych filmaŭ ci mulcikaŭ.
Pačynaŭsia ž biełaruski fest z pytańnia «A čamu paŭsiul jość, a ŭ nas niama?», kažuć zusim nie staryja «vieterany» JuniKona.
— Pieršapačatkova heta było vielmi małabiudžetna — para školnikaŭ i para studentaŭ. Ideja była — my chočam takoha, jak u ich, ale da ich jechać doraha, davajcie zrobim u siabie svajo. Pieršy raz (na JuniKonie) było čałaviek 50. Ale my zrazumieli, što ŭ ludziej jość cikavaść, i pačali arhanizoŭvać užo na inšym uzroŭni, — kaža Pavał Čabaj.
Z kožnym hodam kolkaść udzielnikaŭ pavialičvałasia ŭ razy. U minułym hodzie z pośpiecham u Pałacy kultury MAZa prajšoŭ treci JuniKon, na jaki pryjšło pad tysiaču čałaviek. U hetym hodzie fest pieraros užo i hetuju placoŭku i pierajedzie ŭ «Čyžoŭku-Arenu».
Vyras jakasny i kolkasny ŭzrovień fiestyvalu, pašyryŭsia i tematyčny absiah — u 2015 hodzie ŭpieršyniu u JuniKonie buduć udzielničać amatary fentezi — «Uładara piarścionkaŭ», «Hulni prastołaŭ», suśvietu Hary Potera.
Adnak ad pryciahnieńnia fanataŭ anime arhanizatary pakul ustrymlivajucca.
— Fiestyval anime (u miežach festu moładzievaj uschodnieazijackaj kultury) u Biełarusi pravodziać, a voś festu anałahičnaj sučasnaj jeŭrapiejskaj masavaj kultury niama. Takim čynam, jon zapatrabavany i z hetaha punktu hledžańnia, — adznačyła kreatyŭny pradziusar Halina Vaškievič.
Akramia śpiecyjalizavanych stendaŭ, budzie dziejničać ahulnaja scena, na jakoj adbuducca i najbolš hučnyja, i bolš akademičnyja mierapryjemstvy — hetak, arhanizatary dumajuć zaprasić niekatorych viadomych piśmieńnikaŭ-fantastaŭ, ale pakul trymajuć imiony zaprošanych u sakrecie.
Našy ziemlaki pačali z małoha, a ciapier u prahramie davoli maładoha biełaruskaha fiestyvalu ŭžo šmat rečaŭ, jakich nie sustrenieš na anałahičnych festach u inšych krainach. Chočacie daviedacca jakich? Znajści novych znajomych? Paviesialić svaich dziaciej?
Možacie praz aficyjny sajt festu unicon.by dałučycca da 27 hrup fanataŭ, jakija rychtujuć stendy.
Ci prosta prychodźcie na 4 biełaruski fiestyval fantastyki, fentezi, komiksaŭ i kampjutarnych hulniaŭ UniCon 18-19 krasavika hetaha hoda.
