U lutym u Ryzie i Vilni adbuducca dźvie imprezy, jakija mohuć zacikavić biełaruskich amataraŭ piva. Dzie spatolić smahu i pakaštavać redkija sarty piva? «Viestki» zaprašajuć na dehustacyju da našych paŭnočnych bałckich sukrevičaŭ.
intangiblebusiness.com
U Amierycy i Jeŭropie ŭžo niekatory čas nazirajecca fienomien, kali bary pačynajuć prapanoŭvać na raźliŭ albo ŭ butelkach nie standartnuju, kamiercyjnuju pradukcyju vialikich vytvorcaŭ, a hatunki piva małych i nieviadomych brovaraŭ. Hetuju źjavu prazvali kraftavaj revalucyjaj. Ad anhielskaha słova «kraft», jakoje možna pierakłaści jak «majsterstva».
Da krainaŭ Bałtyi hetaja revalucyja ŭžo pastupova dachodzić. Jość bary, jakija śpiecyjalizujucca na tak zvanym «kraftavym» pivie. Jość niebłahija brovary. I jość piŭnyja fiestyvali. Dva ź ich projduć jak raz u lutym.
METENIS
U staražytnaj Ryzie 21-22 lutaha adbudziecca štohadovaja asambleja kraftavaha piva Bałtyi. Heta vydatnaja mahčymaść nie prosta pakaštavać najlepšaje piva Estonii, Łatvii i Litvy, ale paznajomicca ź pivavarami.
Patrapić na fest možna biaspłatna. Płacić treba tolki za piva. A košty vielmi demakratyčnyja — ad 1 da 3 eŭra za probnik. Bolšaść brovaraŭ, jakija zaprošanyja na hety fest, — małyja vytvorcy, i ich pradukcyju vy nie znojdziecie ŭ praduktovych kramach navat tych krainaŭ, dzie jany znachodziacca. U pryvatnaści buduć pradstaŭlenyja nastupnyja brovary: Hampelmann brewery, Lehe, Ollenaut, Pohjala i Puhaste z Estonii, Eridan, Labietis, Līgatnes alus i Malduguns z Łatvii i Dundulis ź Litvy.
Fest projdzie pa adrasu: Aristida Briāna 9 pagalms / Courtyard of Aristida Briana 9, Ryha. Da Ryhi ź Biełarusi možna dajechać aŭtobusam albo ciahnikom.
ŽMOGŠALA II — fiestyval ekzatyčnaha piva
28 lutaha, to bok roŭna praz tydzień paśla festu ŭ Ryzie, amataraŭ piva zaprašaje Vilnia, dzie adbudziecca ŭžo druhi pa liku fest ekzatyčnaha piva. Na feście čakajecca piva z usiaho śvietu. Svoj udzieł paćvierdzili raznastajnyja brovary i pradaŭcy kraftavaha piva ź Litvy, Bałtyi i Polščy. Na feście budzie arhanizavana nie tolki dehustacyja piva, buduć i prezientacyi novych sartoŭ i knihi pra litoŭskaje piva, i pradstaŭleńnie vytvorcaŭ piva i lekcyi, i navat aŭkcyjon redkich sartoŭ piva.
Košt kvitka — 7 jeŭra, kali nabyvać zahadzia. Standartny košt — 10 jeŭra. Kvitok možna kupić u Alaus namai, Alaus kolonėlė, Baras ŠUO, ci pa telefonie 8 676 73937.
Jak dajechać da Vilni, viedaje ci nie kožny biełarus:). Ciahniki, aŭtobusy, aŭtaspyn. Napierad!
