Elysia chlorotica. Fota: Patrick Krug
Ślimak charčujecca vodaraściami Vaucheria litorea. Jašče ŭ 1970-ch navukoŭcy zaŭvažyli, što jon nie pieratraŭlivaje chłarapłasty, a ŭklučaje ich va ŭłasnyja stravavalnyja kletki. U składzie ślimaka kletki praciahvajuć fotasintez i vypracoŭvajuć vuhlavody i tłuščy.
Žyvioła faktyčna pierachodzić da raślinnaha ładu žyćcia, kali pahłynaje dastatkova vodaraściaŭ.
Chłarapłasty ŭ ciele ślimaka pracujuć da 9 miesiacaŭ — značna dolej, čym u składzie vodaraściaŭ. Elysia chlorotica viartajecca da zvykłaha dla žyvioł sposabu charčavańnia tolki ŭ doŭhaj ciemry, ad jakoj chłarapłasty chutka hinuć.
Doŭhaje žyćcio chłarapłastaŭ naściarožyła daśledčykaŭ: sama žyvioła nie moža ich vyrablać, značyć, pavinna niejkim čynam padtrymlivać ich u naležnym stanie. Vyśvietliłasia, što ślimak «ramantuje» chłarapłasty z dapamohaj enzimu, dla vypracoŭki jakoha spatrebiłasia by niezvyčajnaja źmiena ŭ DNK.
Kab «ramantavać» chłarapłasty, ślimaki zapazyčyli ŭ raślin hien prk, jaki staŭ pieradavacca z pakaleńnia ŭ pakaleńnie.
Navukoŭcy złavili na «kradziažy» hienaŭ raślinapadobnuju žyviołu: jany znajšli ślimaka, jaki nie charčavaŭsia vodaraściami Vaucheria litorea, uviali jamu sintetyčny anałah hienu i pranazirali, što štučna stvorany hien daskanała pakłaŭsia na chramasomu žyvioły. Daśledčyki nazyvajuć vypadak Elysia chlorotica «naturalnaj hiennaj terapijaj» i dadajuć: «Taki miechanizm nie musiŭ pracavać, ale voś jon i voś jaho vydatny vynik».
***
Nie tolki žyvioły padhladajuć za raślinami, ale i raśliny — za žyviołami. Naprykład, niekatoryja raśliny siamiejstva rasicavych «kusajucca». Listy raśliny, abkružanyja vostrymi šypami, zmykajucca, kali ŭ ich traplaje nasiakomaje. Raślina pieratraŭlivaje nasiakomaje i takim čynam charčujecca. Ale nasiakomajadnyja raśliny nie «kraduć» hieny achviar.
