Dałučeńnie Kryma da Rasiei ŭchvalajuć 93% krymčan, tolki 4% vystupajuć suprać, vyśvietliła markietynhavaja kampanija GfK Ukraina. Svajo daśledavańnie ŭ Krymu jany pravodzili pa zamovie kampanii Berta Communications dla ŭkrainskaha prajekta Free Crimea.
Zvyš za pałovu krymčan paviedamili, što paśla dałučeńnia da Rasii ich materyjalnaje stanovišča palepšała (macniej za inšych heta adčuli piensijaniery), bolš za ŭsio žycharoŭ paŭvostrava turbujuć uzbrojeny kanflikt na ŭschodzie Ukrainy, rost cenaŭ i transpartnaja izalacyja (u moładzi na pieršym miescy inflacyja), a ŭ pačatak poŭnamaštabnaj vajny Rasii z Ukrainaj vierać tolki 14% apytanych. Pry hetym 84% krymčan hladziać rasiejskija telekanały, ale tolki 10% im daviarajuć — u lidarach pa infarmacyjnym daviery sacyjalnyja sietki.
U tym, što ŭkrainskija ŚMI paviedamlajuć niapraŭdu pra toje, što adbyvajecca ŭ Krymie, upeŭnienyja amal 80% respandentaŭ.
Uviesnu 2014 hoda, pavodle źviestak Lavada-centra, dałučeńnie da Rasii padtrymlivali 79% krymčan. Sacyjołahi tłumačać rost padtrymki efiektam vajny ŭ Danbasie. Žychary bajacca, što ŭ vypadku, kali b anieksii nie adbyłosia, Krym siońnia taksama staŭsia b zonaj hramadzianskaj vajny.
Adzin sa stvaralnikaŭ Free Crimea Taras Bierazaviec miarkuje, što vyniki apytańnia tłumačacca jak bojaźziu ludziej kazać praŭdu, tak i rasčaravańniem, što ŭkrainskija ŭłady nie zdolnyja ničoha zrabić dla praŭkrainskich nasielnikaŭ Kryma. Jon taksama nahadvaje, nakolki hnutkaj byvaje hramadskaja dumka. U 1991 hodzie 90% žycharoŭ Kryma na refierendumie vykazałasia za zachavańnie SSSR, a ŭ kancy hoda ŭžo 52% ludziej prahałasavali za niezaležnaść Ukrainy.
