U miastečku Maleč na Bieraściejščynie adbyŭsia schod, na jakim sialanie vykazali čynoŭnikam niezadavalnieńnie zabaronaj trymać śviniej. Abiacajuć razbracca.
Čynoŭniki apraŭdvalisia, kazali, što štrafavać sialanaŭ nia buduć, ale i pahražali, što kali raptam u Malečy źjavicca afrykanskaja čuma śviniej, to heta budzie na sumleńni viaskoŭcaŭ.
Za kilametar ad miastečka Maleč Biarozaŭskaha rajonu znachodzicca ferma, jakaja naležyć Biarozaŭskamu kambikormavamu zavodu. Mienavita z-za hetaj fermy niekalki hod viaskoŭcam było zabaroniena trymać śviniej — čynoŭniki takim čynam pierastrachoŭvalisia na vypadak źjaŭleńnia afrykanskaj čumy.
Adnak try miesiacy tamu ŭrad vydaŭ pastanovu ab źmianšeńni bufernych zonaŭ vakoł fermaŭ z 5 kilametraŭ da 500 metraŭ. Raniej u zonu traplali 17 viosak Biarozaŭskaha rajonu. Ludzi musili pierabić svaich śviniej. Žyćcio paśla hetaha stała prykmietna ciažejšym, bo z pryčyny nievysokich zarobkaŭ u kałhasach mnohija viaskoŭcy žyvuć faktyčna z padsobnych haspadarak.
Tak rabili pa ŭsioj Biełarusi, adnak tolki ŭ Malečy viaskoŭcy ładzili pratesty.
4 lutaha ŭ zali sielsavietu adbyŭsia schod žycharoŭ Maleča i rajonnych čynoŭnikaŭ, na jakim znoŭ abmiarkoŭvałasia «śvinaja prablema». Na schodzie sialanie ŭźniali pierad čynoŭnikami pytańnie: čamu, niahledziačy na pastanovu ŭradu, u vioscy praciahvajuć štrafavać za ŭtrymańnie śviniej.
Na schodzie prysutničaŭ namieśnik staršyni Biarozaŭskaha rajvykankamu pa sielskaj haspadarcy Michaił Krejdzič, inšyja čynoŭniki. Jany tłumačyli, što adbylisia pierahiby i što z hetaj sytuacyjaj raźbiarucca.
Sialanie ŭzdymali pytańnie ab likvidacyi fermy kala Maleča. Abhruntoŭvali heta tym, što jana pabudavanaja kala piacidziesiaci hadoŭ tamu i nie adpaviadaje sučasnym patrabavańniam.
Adkaz byŭ taki, što pakolki ferma naležyć kambikormavamu zavodu, dyk jon i pavinien prymać rašeńnie ab jaje zakryćci. Razam z tym čynoŭniki zapeŭnili sialanaŭ, što ferma adpaviadaje sanitarnym normam.
Schod byŭ dosyć emacyjny:
Spadar: «U nas ničoha nia zdaryłasia, a vy vyrezvali… Vam jašče stralać zastałosia. 20 bazavych štrafu — heta bzdura…»
Druhi spadar: «Našto ludziej było strašyć?! Našto?..»
Na schodzie vystupiŭ fermer Alaksandar Alichvier, jakoha ŭ 2013 hodzie ŭłady zmusili pierabić sotni śviniej. Spadar zajaviŭ, što ŭłady ihnarujuć prablemy prostych hramadzianaŭ, i paraŭnaŭ dziejańni ŭładaŭ z pracaj «arhanizavanaj złačynnaj hrupoŭki», jakaja kirujecca tolki svaimi intaresami:
«Vy vinavacicie čałavieka ŭ parušeńni praviłaŭ, jakija ŭ dadzieny momant na terytoryi Respubliki Biełaruś nia dziejničajuć…»
Biarozaŭskija čynoŭniki pryznali, što jość ciahanina z pryniaćciem rašeńnia rajvykankamu, jakoje maje dazvolić trymać sialanam śviniej. Ale vinu za heta ŭskłali na abłasnych čynoŭnikaŭ — maŭlaŭ, u vobłaści doŭha marudziać ź jurydyčnymi pytańniami.
Na schodzie vystupiŭ aktyvist kampanii «Havary praŭdu» i sacyjał-demakratyčnaj partyi Valancin Łazarenkaŭ. Na minułych parlamenckich vybarach Łazarenkaŭ byŭ kandydatam u deputaty pa hetaj akruzie, ale sastupiŭ, pavodle aficyjnych dadzienych, praŭładnamu kandydatu. U svaim emacyjnym vystupie Łazarenkaŭ uskłaŭ vinu za prablemy viaskoŭcaŭ na miascovyja ŭłady:
«Ja bačyŭ toj, saviecki navat, Maleč. U zhodzie vyrašalisia pytańni, i nie było takich schodaŭ sprečnych i skandalnych. Značyć, ułada ciapier i na ŭzroŭni sielsavietu, i na rajonnym uzroŭni niešta nia tak robić…»
Valancin Łazarenkaŭ nastojvaŭ, što staraja ferma kala Maleča pavinna być začynienaja, tady i adpadzie prablema z utrymańniem śviniej prostymi sialanami.
Padobny «śviny bunt» u Malečy ŭžo byŭ uviesnu 2014 hodu, a praź niekatory čas stała viadoma, što Bieraściejski abłvykankam chadajničaŭ va ŭrad ab źmianšeńni bufernych zonaŭ vakoł fermaŭ.
U Biarozaŭskim rajonie ŭvosień 2013 hodu žychary 17 viosak musili źniščyć pahałoŭje śviniej na svaich padvorkach.
Ź inicyjatyvy ŭładaŭ śviniej u vioskach zabivajuć dziela prafilaktyki «afrykanskaj čumy śviniej». Pry hetym biarozaŭskija čynoŭniki kažuć, što nivodnaha vypadku zachvorvańnia śviniej na hetuju čumu ŭ rajonie nie było.
