Habrei Viciebska i Sankt-Pieciarburha inicyjavali dobraŭparadkavańnie adnaho z samych starych habrejskich pomnikaŭ u Biełarusi — mohiłak u miastečku Biešankovičy Viciebskaj vobłaści. Pra heta paviedamiŭ karespandentu BIEŁTA kiraŭnik habrejskaj hramady Viciebska, historyk i žurnalist Arkadź Šulman.
«Apošnija pachavańnia pravodzilisia niekalki dziesiacihodździaŭ tamu. Raz bo ŭ Biešankovičach ŭžo niama habrejskaj hramady, a ŭ tych starych habrejaŭ, chto dažyvaje tut svoj viek, niama siły na rasčystku mohilnika, kłady paraśli chmyzam. U paradkavańni voźmie ŭdzieł hrupa ź Viciebska, Minska, Sankt-Pieciarburha, čyje prodki žyli ŭ pryhožym miastečku Biešankovičy. Dałučacca i chłopcy z navapołackaha moładzievaha hramadskaha abjadnańnia. Taksama abiacaŭ padklučycca miascovy lashas, na terytoryi jakoha raźmieščany mohiłki. I my zaprašajem usich nieabyjakavych dałučycca da hetaj akcyi», — skazaŭ Arkadź Šulman.
Jak kaža zachavalnik fondaŭ rajonnaha historyka-krajaznaŭčaha muzieja Stanisłaŭ Leanienka, mohiłki dobra zachavalisia. Jany zajmajuć płošču 4 ha i naličvajuć zvyš 200 nadmahillaŭ, jakija bačnyja na pavierchni. Pad ziamloj ža znachodziacca jašče sotni, a, mahčyma, i tysiačy. Zhodna z nadpisam na kamianiach na habrejskaj, samaje staroje pachavańnie datujecca 1703 hodam.
Usiaho ŭ Biełarusi zachavałasia kala dvuchsot habrejskich mohiłak.
