Źnižeńnie dvuchbakovaha tavaraabarotu za apošnija dva hady z 43 da 37 młrd. dołaraŭ ZŠA (na 14%) było ŭ centry ŭvahi na sustrečy premjer-ministra Rasii Dźmitryja Miadźviedzieva i jaho biełaruskaha kalehi Andreja Kabiakova. Pieramovy prajšli 5 lutaha ŭ padmaskoŭnych Horkach.
«Apošnim časam, na žal, namieciłasia peŭnaja tendencyja: naš uzajemny tavaraabarot u siłu cełaha šerahu abjektyŭnych, a moža, i subjektyŭnych akaličnaściaŭ pačaŭ kryšku źnižacca… My pavinny abmierkavać, što ź im adbyvajecca, i namiecić miery, kab adnavić i pieravysić tyja pikavyja značeńni, jakija mieli zusim niadaŭna», — zajaviŭ Kabiakoŭ, słovy jakoha pryvodzić pres-słužba rasijskaha ŭrada.
«U suviazi z hetym ja skazaŭ by, što my vielmi ŭvažliva nazirajem za tym, što robicca ŭ Rasijskaj Fiederacyi ŭ hetaj niaprostaj ekanamičnaj situacyi, — zaznačyŭ jon. — Toj płan mierapryjemstvaŭ, jaki raspracavaŭ urad Rasii i zaraz zaćvierdziŭ, aktyŭna abmiarkoŭvajecca ŭ hramadstvie, vypracoŭvajucca peŭnyja miery pa jaho realizacyi. Nam heta ŭsio vielmi cikava, tamu što my (heta naš kanstytucyjny abaviazak) pavinny na praciahu miesiaca ŭnieści prahramu dziejańniaŭ urada Respubliki Biełaruś našamu parłamientu ŭ suviazi sa źmienaj składu ŭrada. Nu i naohuł heta nam vielmi važna, tamu što sapraŭdy ekanamičnaja situacyja ŭ Respublicy Biełaruś patrabuje taho, kab my skaardynavali našy dziejańni, a ŭzajemny tavaraabarot našych dźviuch krain taki, što vielmi vialikaja ŭzajemazaležnaść bakoŭ ad jaho vynikovaści».
Pavodle słoŭ Kabiakova, jon vielmi rady, što Miadźviedzieŭ pahadziŭsia z prapanovaj raspracavać prahramu skaardynavanych dziejańniaŭ pa zabieśpiačeńni ekanamičnaha ŭzajemadziejańnia na dvuchbakovaj asnovie.
«My vielmi raźličvajem, što zdolejem padrychtavać hety płan, kab vyšejšyja słužbovyja asoby ŭ miežach Vyšejšaha dziaržsavieta Respubliki Biełaruś i Rasijskaj Fiederacyi zmahli, moža, jaho ŭžo i pryniać, kali ŭrady paśpiejuć padrychtavać», — skazaŭ biełaruski premjer-ministr.
U prahramie, rastłumačyŭ jon, praduhledžany šerah surjoznych mier, kab likvidavać barjery pa ruchu tavaraŭ i pasłuh va ŭzajemnym handli. «Kab skarektavać našy prahramy impartazamiaščeńnia — heta vielmi važna siońnia. Kab my ŭ bolšaj stupieni vykarystoŭvali raźliki nacyjanalnyja ŭ siońniašnim tavaraabarocie. Pieraadoleli finansavyja piki, jakija ŭźnikajuć u hetych niaprostych ekanamičnych umovach, uzhadnili makraekanamičnuju palityku», — zajaviŭ Kabiakoŭ.
Dźmitryj Miadźviedzieŭ nahadaŭ, što papiaredniaje pasiadžeńnie sajuznaha Saŭmina adbyłosia ŭ Minsku ŭ kastryčniku minułaha hoda, i prapanavaŭ pravieści nastupnaje ŭ pieršym paŭhodździ na terytoryi Rasii.
Rabočy vizit Kabiakova ŭ Maskvu prachodzić 5—6 lutaha. Pieramovy ź Miadźviedzievym u pieršy dzień nasili niefarmalny charaktar. U druhi dzień adbudziecca pasiadžeńnie Jeŭrazijskaha mižuradavaha savieta.
Jak užo paviedamlałasia, 8 lutaha ŭ Sočy projdzie sustreča Uładzimira Pucina i Alaksandra Łukašenki.
