Frahmient afišy kancertu
Jak piša arhanizatar kancertu Siarhiej Budkin, 29 studzienia paśla prodažu bolšaj častki kvitkoŭ kłub u vusnaj formie paviedamiŭ, što nie moža vykanać abaviazki pa praviadzieńni mierapryjemstva. Maŭlaŭ, kłub musić prypynić dziejnaść na niavyznačany tersin praz adklučeńnie elektryčnaści za zapazyčanaść pa apłacie.
Dyrektar kłuba Anatol Danilčanka raspavioŭ «Našaj Nivie», što kancert ad pačatku nie moh adbycca, bo było viadoma pra adklučeńnie śviatła i rospusk štatu ŭ hety dzień.
«Ja jak dyrektar nie padpisvaŭ damovu i nie viedaŭ ab hetym, — śćviardžaje jon. Vyrašali niesurjozna, praz pasiarednikaŭ niejkich tam, jakija ŭ mianie naohuł, kali ščyra da kanca kazać, u mianie prosta i nie pracujuć. Jany ŭ mianie takija ža arhanizatary, jak i Budkin. Jak jon ź imi damaŭlaŭsia, pra što razmova šła…».
Pra toje, ci adbudziecca rehi-fiestyval, zapłanavany na nastupny dzień, Danilčanka ničoha skazać nie moža. Kvitki na mierapryjemstva pakul pradajucca.
Tym časam Siarhiej Budkin raspavioŭ «NN», što maje nie tolki zaćvierdžanaje hastrolnaje paśviedčańnie, ale i padpisanuju Danilčankam damovu.
«Z čaho možna zrabić vysnovu, što my nie abmiažoŭvalisia telefonnymi razmovami, a supracoŭničali. I nie pieršy raz», — kaža jon.
Akramia taho, Budkin zrabiŭ papiaredniuju apłatu za mierapryjemstva. Jon pakul nie atrymaŭ piśmovaha paćvierdžańnia admieny kancertu, choć kaža, što damova hetaha patrabuje ŭ vypadku niemahčymaści praviadzieńnia.
«Toje, što mnie było skazana ŭ vusnaj formie, ja staŭlu pad sumnieŭ, bo jano moža nie adpaviadać rečaisnaści», — śćviardžaje Budkin. Pavodle jaho słoŭ, inšym arhanizataram kancertaŭ u bližejšyja dni ničoha pra niemahčymaść praviadzieńnia nie paviedamlałasia.
Kvitki na kancert 6 lutaha Budkin pakul zdavać nie raić.
Jon ličyć, što admiena kancerta niavyhadnaja nie tolki hurtu i arhanizataram, ale i ŭładalnikam kłubu. Ad administracyi rajonu pieraškodaŭ jon nie mieŭ. U bližejšyja dni Budkin abiacaje vyśvietlić padrabiaznaści «niedaadmieny» kancertu.
***
Kłub «Piraty» byŭ placoŭkaj dla raznastajnych kancertaŭ, u tym liku biełaruskich rok-vykanaŭcaŭ, u tym liku N.R.M. i Sciana. 12 śniežnia ŭ «Piratach» prajšła premija Tuzin.FM «Hieroi hoda», dzie pieramožcam staŭ hurt Dzieciuki. Zatym Dzieciuki 9 studzienia paśpiachova adyhrali tam solny kancert, Ale na pank-viečarynu, što prachodziła na nastupny dzień, zavitaŭ AMAP. Usim zatrymanym vysunuli abvinavačańnie ŭ drobnym chulihanstvie, dvaich zatrymanych asudzili na 10 sutak aryštu za raspaŭsiud ekstremisckaj litaratury.
