Člen Savieta Fiederacyi, były bajec śpiecnazu Dźmitryj Sablin abviaściŭ, što ŭ Rasii stvorany ruch «Antymajdan».
fota AR
Na pres-kanfierencyi ŭ Maskvie, Sablin, jaki źjaŭlajecca taksama adnym ź lidaraŭ arhanizacyi «Bajavoje bractva», patłumačyŭ zadačy ruchu: «My prosta budziem źbiracca tam, dzie źbirajecca apazicyja».
Sablin paviedamiŭ taksama, što ruch budzie mieć svoj štab, vykankam i «piersanalnaje dobraachvotnaje siabroŭstva». Rašeńnie pra kiraŭnikoŭ ruchu i jaho dalejšaje finansavańnie, pa słovach sienatara, pakul nie pryniata.
Inšy ŭdzielnik pres-kanfierencyi, lidar motakłuba «Načnyja vaŭki» Alaksandr Załdastanaŭ (Chirurh) skazaŭ, što arhanizatary «Antymajdanu» nie źbirajucca čakać śpiecyjalnaha dazvołu ŭładaŭ, kab pačać svaju dziejnaść, pakolki «aranžavy źviarok ŭžo točyć zuby na našu krainu».
«Ja baču, jak zaakijanskija staryja ŭžo piakuć piražki, kab razdavać ich tut, u nas na płoščach, nackoŭvajučy ludziej adno na adnaho», — paviedamiŭ Chirurh.
U miemarandumie novaha ruchu havorycca: «My rašuča zajaŭlajem, što nie dapuścim siłavoha źviaržeńnia zakonna abranaj ułady, jakimi b pryhožymi łozunhami hety hvałt ni prykryvaŭsia».
Siarod metaŭ ruchu jaho arhanizatary nazyvajuć abaronu tradycyjnych kaštoŭnaściaŭ Rasii i kanstytucyjnaha paradku «bieź vialikich uzrušeńniaŭ». Na dumku Dźmitryja Sablina, ciapier idzie sproba padarvać, u tym liku, sacyjalna-ekanamičnuju situacyju ŭ Rasii, kab vyklikać niezadavolenaść siarod nasielnictva i pasprabavać «raskrucić majdan».
«My sabralisia z toj metaj, kab hetaha nie dapuścić, bo nielha, kab mienšaść naviazvała svaju volu bolšaści», — śćviardžaje Sablin.
