Kali vieryć archieałahičnym znachodkam, to dentalnaj impłantacyjaj – užyŭleńniem inšarodnych cieł u kostku skivicy dziela adnaŭleńnia estetyčnaj i žavalnaj funkcyj – pieršymi zakłapacilisia jašče majia. Jak ni dziŭna, ale vyrazanyja kamieńčyki dy frahmienty rakavin u niekatorych pacyjentaŭ pryžyvalisia i vykonvali rolu stračanych zuboŭ.

Sučasnaja impłantacyja zuboŭ pačałasia ŭ 1970-ch hadach. Sami impłanty — imitacyja korania zuba, jany źmiaščajucca ŭ zroblenuju ŭ kostcy adtulinu, nad imi zašyvajecca dziasna i, paśla pieryjadu pryžyŭleńnia, na vyzvalenuju z-pad dziasny hałoŭku nakručvajecca toje, što zamienić bačnuju častku zuba.

Vynik vyhladaje ašałamlalna: siarod ułasnych zuboŭ (jakija nie treba abtočvać i pakryvać karonkami) raptam uźnikajuć halivudskija pryhažuny, tak kruta padabranyja pa formie dy kolery, što vyhladajuć lepiej, čym rodnieńkija! Žuj, hryzi, a hałoŭnaje — paśmichajsia na ŭsie 32! Ničoha z rotu nie vykiniecca, dykcyja nie psujecca, i kožnyja 3—5 hod pierarablać nie davodzicca!

Dantysty ekśpierymientujuć z formaj i materyjałami, ź jakich robiacca impłanty i pratezy, a taksama vynachodziać novyja mietady madeliroŭki skivičnaj kostki. Tamu pakazańni dla apieracyi pastajanna pašyrajucca.

I ŭsio ž lubaja apieracyja — u vialikaj stupieni łatareja. Navat banalnaje vydaleńnie zuba moža abiarnucca trahiedyjaj. Sumlenny doktar, jaki nie miarkuje źniknuć z vašymi hrašyma, abaviazany razžavać vam usio ŭ detalach i ŭziać piśmovaje paćvierdžańnie, što vy infarmavanyja i zhodnyja ryzyknuć.

Kamu pakazanyja impłanty

Kali vy — adnosna małady, paraŭnalna zdarovy čałaviek, jaki straciŭ zuby praz traŭmu albo ad naradžeńnia majecie niapoŭny kamplekt pastajannych zuboŭ; kali vy stracili adzin ci niekalki zuboŭ praz adsutnaść albo nizkuju jakaść stamatałahičnaj dapamohi — impłantacyja vaš šlach. Nie zapuskajcie prablemu, čym raniej vy źviernieciesia da admysłoŭca, tym mienš budzie kaštavać pracedura.

Ludziam pieradpiensijnaha vieku varta ćviaroza acanić stan svajho zdaroŭja, raspytać lekara pra ŭsie mahčymyja, a asabliva — datyčnyja vašaj situacyi ryzyki.

Kamu niavarta dumać pra impłanty

Zrazumieła, dantysty skažuć vam, što kožnamu darosłamu ad 18 i da 85 hatovyja padaryć biełazubuju ŭśmiešku. Ale heta, pa ščyraści, rekłamny chod. Kali vy — zvyčajny biełaruski piensijanier, jaki ŭžo hod jak dvaccać straciŭ asnoŭnuju častku zuboŭ i nie karystajecca zubnymi pratezami tradycyjnych kanstrukcyj, sproba zrabić impłantacyju niasie vam šerah siurpryzaŭ. Pakinuŭšy ŭ baku astranamičnyja košty, zaznačym: ustanoŭka impłantaŭ — davoli doŭhi praces, praciahłaść jakoha možna pradkazać tolki pryblizna. Kala 6 miesiacaŭ zojmie tolki pryžyvańnie unutrykosnaj častki impłantaŭ. Kali vam daviałosia jašče i madelavać kostku — mahčyma, u vas uźniknie zapaleńnie, zalačyć jaho — sprava miesiacaŭ, adpaviedna, i nahruzku na takuju kostku možna budzie davać paźniej.

Adčuŭšy poŭny rot zuboŭ, vy možacie zamiest ščaścia atrymać šmatmiesiačny niaścierpny hałaŭny bol z-za adnaŭleńnia vyšyni prykusu (heta datyčyć tych, chto straciŭ zadnija zuby, ale praciahvaŭ žavać piarednimi, nie staviačy pratezaŭ, ciaham niekalkich hadoŭ). Uličvajcie, što da kožnych 2—3 mm vyšyni prykusu davodzicca pryzvyčajvacca kala 1—2 miesiacaŭ (abnaŭlajučy nazubnyja nakładki), a straty vyšyni byvajuć i 1,5—2 sm, a to i bolej, tamu padrychtoŭka da pratezavańnia moža zaniać bolš za hod. Ihnaravańnie hetaha etapu — adna z pryčyn, pa jakoj častka ludziej nie moža karystacca navat jakasnymi pratezami.

Kali vy — sardečnik albo dyjabietyk ź vialikim stažam, šancy na pryžyŭleńnie impłantaŭ i doŭhi termin ich słužby davoli pryvidnyja. Kali vy ŭ niejkim uzroście mieli praciahłyja (chraničnyja) zapalenčyja ŭskładnieńni paśla vydaleńnia zuboŭ albo paśla adkrytych pierałomaŭ skivicy (asteamijalit), kali vam vydalali navatvory skivičnaj kostki (osteabłastakłastoma i t.p.), — hetyja ŭčastki małaprydatnyja dla impłantacyi i patrabujuć dadatkovaj uvažlivaści.

Kali ŭ vas ankałahičnyja prablemy ŭ vobłaści tvaru ci šyi, i raptam uźniknie nieabchodnaść apramieńvańnia — ź impłantami daviadziecca raźvitacca, jak i ź mietalovymi płombami dy pratezami.

Niavarta ryzykavać tym, chto viedaje za saboj alerhiju na mietały — prynamsi biez dadatkovych testaŭ.

I, zrazumieła, kali dla vas atrymać u zuby — rehularnaja i nieadjemnaja padzieja žyćcia (vy — baksior, u vas chvaroba, praź jakuju vy časta i niaŭdała padajecie, albo vy žyviecie pa zakonach džunhlaŭ) — nie vykidajcie hrošy na viecier.

Vam skažuć, što impłanty — heta raz i nazaŭždy. Praktyka pakazvaje advarotnaje.

Vydalać impłanty šlacham apieracyi davodzicca, kali z-za atrafii kostki ŭtvarajucca «kišeni» i ankier pačynaje chistacca (toje, što adbyvajecca z paradantoznymi zubami), kali impłant z-za lekarskaj pamyłki albo z-za patałahičnaha pracesa ŭ kostcy pad žavalnaj nahruzkaj pravaliŭsia ŭ hajmaravu pazuchu (na vierchniaj skivicy) ci ŭ kanał nerva (na nižniaj). Kali adbyŭsia pierałom skivicy albo raźviŭsia asteamijelit ci navatvor u miescy ŭstanoŭki impłanta. Paŭtornaja impłantacyja mahčymaja nie zaŭsiody i nie adrazu.

Tak, impłantacyja — pieradavy mietad, ale nivodny mietad nie moža pasavać kožnamu. I kali vam apisvajuć tolki pieravahi lačeńnia, nie spyniajučysia na niedachopach dy ryzykach — zadumajciesia. 

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?