Za dalar u Rasii dajuć užo 72 rubli. Heta biržavyja dadzienyja na 20:00 16 śniežnia. Za niekalki hadzin da taho kurs dasiahaŭ 78 rubloŭ! Što budzie dalej, nie viedaje nichto. Situacyja vyjšła z-pad kantrolu Pucina.
U tym, što rasijski kryzis bje i pa Biełarusi, nie sumniajecca nivodzin ekśpiert. Ekspart biełaruskich tavaraŭ u studzieni-kastryčniku 2014 hoda skłaŭ $31,2 miljarda, pryčym dola Rasii ŭ eksparcie skłała 45%. Raźliki z uschodnim susiedam usio čaściej iduć u rasijskich rublach.
Čaho čakać biełarusam u bližejšaj budučyni?
Asacyjavany ekśpiert Daśledčaha centru Instytuta pryvatyzacyi i mieniedžmienta Źmicier Kruk miarkuje, što Nacbank musić apieradžalna reahavać na abvał u Rasii. Na jaho dumku, kurs biełaruskaha rubla da rasijskaha musić adpaviadać tamu, jaki byŭ u pačatku hoda.
Kurs rasijskaha rubla składaŭ 290 biełaruskich rubloŭ. Vychodzić, dalar musić kaštavać u 60—70 razoŭ bolš – kala 20 tysiač biełaruskich rubloŭ.
Finansavy analityk aficyjnaha partniora «Alpary» ŭ Minsku Vadzim Iosub kaža, što treba rabić biełaruski rubiel bolš hnutkim: «Hod tamu byŭ zadadzieny pryncyp kursaŭtvareńnia – kožnyja tarhi dalar ci vyrastaje na 10 rubloŭ, ci zastajecca na miescy. Hety režym nie źmianiajecca, što b vakoł krainy nie adbyvałasia.
Nadyšoŭ čas ad jaho admovicca i zrabić tak, jak było zadekłaravana ŭ Asnoŭnych nakirunkach hrašova-kredytnaj palityki: kab kurs nacyjanalnaj valuty źmianiaŭsia pad upłyvam popytu i prapanovy».
Što adbudziecca ŭ takoj situacyi ź biełaruskim rublom? «Kursy valut vyraśli b, ale nie naŭprost uśled za rasijskim rublom. Jość sens aryjentavacca na košyk z troch valut – dalar, jeŭra i rubl», – prapanuje Vadzim Iosub. Tady padzieńnie rasijskaha rubla budzie «razmyta» na try valuty, što źmiakčyć efiekt devalvacyi dla nasielnictva.
Nie vieryć u pierśpiektyvy biełaruskaha rubla i palitołah Valer Karbalevič: «Ci zmohuć našyja ŭłady znajści zamiežnyja kredyty? Kali nie znojduć, to daviadziecca rabić devalvacyju, — skazaŭ «Našaj Nivie» jon. — Situacyja dla ŭłady nie prostaja. Ale što naš rubiel budzie słabieć – heta biezumoŭna».
«Ekanamičnaja situacyja budzie zaležać ad dziejańniaŭ ułady i Nacbanka. Kali ničoha nie mianiać, to inflacyja budzie ad 20 da 30%, a naš rubiel moža ŭpaści na tuju ž dolu, što i rasiejski, –
razvažaje były staršynia Nacbanka Biełarusi Stanisłaŭ Bahdankievič. «Treba narešcie skaracić inflacyju da adnaznačnaj vieličyni. Taja ličba, jakaja była zapłanavana – 13% — heta ni ŭ jakija ramki nie lezie, treba kab jana była 5% maksimum, a kali heta niemahčyma, to chacia b mieniej za 10%», – raić jon.
«Kryzis u ekanomicy niepaźbiežny. Jon vyklikany jak unutranymi, tak i źniešnimi pryčynami. Nastupny hod i 2016 buduć dla biełarusaŭ vielmi ciažkimi. Moža nie jak u 2011, moža miakčej, ale situacyja budzie supastaŭnaj. Ja hladžu na rečy dastatkova zmročna», – skazaŭ «Našaj Nivie» zasnavalnik partała Tut.by Jury Zisier.
Tym časam biełaruskija ŭłady nijak nie dekłarujuć hatoŭnaść adpuścić nacyjanalnuju valutu ŭ svabodnaje płavańnie.
«Pytańnie kursaŭtvareńnia ŭ Biełarusi nie ekanamičnaje, a palityčnaje, tamu nie fakt, što jano ŭvohule znachodzicca ŭ śfiery kampietencyi Nacbanka. Nacbank pavinien atrymać ukazańnie ci jak minimum zhodu na admovu ad raniejšaj stratehii», –
padsumoŭvaje Vadzim Iosub.
«Ekanamičnaja situacyja adnaznačna budzie horšać, ale ž u jakich pamierach pakul ciažka skazać. Bo jašče nie vyznačanaja cana na naftu i što budzie z rasiejskaj ekanomikaj. Buduć handlovyja vojny. I dapamoha z rasiejskaha boku budzie skaračacca. Daj boža kab pieraličyli tyja naftavyja pošliny, ab jakich damovilisia. Ahulny fon adnosinaŭ z Rasijaj budzie dastatkova niervovy. Ale
dobra nie budzie: ci drenna, ci zusim drenna», — taki prahnoz na 2015-y daŭ «Našaj Nivie» Źmicier Kruk, ekanamist, jaki dakładna pradkazaŭ papiaredni biełaruski kryzis i ekanamičnuju dynamiku paśla jaho.
