Rasija 11 śniežnia moža adnavić pastaŭki ź niekatorych biełaruskich žyviołahadoŭčych pradpryjemstvaŭ, paviedamiŭ 10 śniežnia ŭ Maskvie pamočnik kiraŭnika Raśsielhasnahladu Alaksiej Alaksiejenka.
«Ciapier u Minsku znachodzicca načalnik našaha ŭpraŭleńnia, jon zajmajecca hetymi pytańniami. Kali tyja harantyi, jakija daje biełaruskaja vieterynarnaja słužba, i vyniki abśledavańniaŭ pa vypraŭleńni niedachopaŭ zadavolać nas, to zaŭtra moža być pryniata rašeńnie ab adkryćci niekalkich pradpryjemstvaŭ», — cytuje pamočnika kiraŭnika Raśsielhasnahladu RIA Novosti.
Pry hetym Alaksiejenka nie ŭdakładniŭ kolkaść i nazvy pradpryjemstvaŭ. «Usio zaležyć ad kankretyki», — skazaŭ jon.
Jak paviedamlaŭ BiełaPAN, 9 śniežnia ekśpierty Raśsielhasnahladu, upaŭnavažanych orhanaŭ Biełarusi i Jeŭrazijskaj ekanamičnaj kamisii pačali pravierku biełaruskich miasa-małočnych pradpryjemstvaŭ. Jaje meta — acanić stan spraŭ na pradpryjemstvach Biełarusi, jakija ažyćciaŭlajuć pastaŭki pradukcyi žyviolnaha pachodžańnia ŭ RF, dla najchutčejšaha źniaćcia časovych abmiežavańniaŭ.
Zabaronu na ŭvoz miasnoj i małočnaj pradukcyi šerahu biełaruskich pradpryjemstvaŭ Rasija ŭviała ŭ listapadzie «ŭ suviazi ź niedapuščalnym uzroŭniem utrymańnia antybijotykaŭ, a taksama salmanieły i kišačnych pałačak u pradukcyi hetych pradpryjemstvaŭ».
Uviadzieńnie abmiežavańniaŭ na ekspart u Rasiju biełaruskaj miasnoj i małočnaj pradukcyi vyklikała niezadavalnieńnie Alaksandra Łukašenki. 9 śniežnia na sustrečy ź dziaržsakratarom Sajuznaj dziaržavy Ryhoram Rapotam jon zajaviŭ: «Vy nas paprasili pastavić voś hetyja ab`iomy małočnych i miasnych praduktaŭ, ryby i hetak dalej, usio raśpisali. Dyk jašče hetyja kvoty nie vybranyja, my jašče nie pastavili hetyja ab`iomy. Što ž nas paprakać, što my ŭžo zanadta pierakarmili vas, rasijan. I potym, heta naohuł nie sur`iozna. My voś na hetuju temu mała źviartajem uvahu, ale heta nie značyć, što jana nie isnuje. Heta nie toje što niadobrasumlennaja kankurencyja, heta naohuł naš brat rodny (rasijanie), jon ža nie prosta nie puskaje našu pradukcyju — stvaraje joj antyrekłamu, zajaŭlajučy ab tym, što jana niebiaśpiečnaja i jašče tam čahości. Vy, jak čałaviek, jaki pastajanna kuplaje biełaruskaje, skažycie, u čym adsutnaść biaśpieki ŭ našaj pradukcyi? Bo my ž na paradak vyšejšyja ŭ hetych pytańniach za rasijan. Dyk treba b u Rasii pahladzieć, jakaja biaśpieka ich praduktaŭ».
