Deputat Viarchoŭnaj rady Ukrainy Alaksiej Parašenka, starejšy syn prezidenta krainy Piatra Parašenki, raspavioŭ u intervju telekanału «1+1» padrabiaznaści svajho ŭdziełu va ŭzbrojenym kanflikcie na ŭschodzie krainy.

«Ja nie źjaŭlajusia prafiesijnym vajskoŭcam. I, viadoma, ja nie jaki-niebudź kamandas, jaki pa pieradavoj łaziŭ i rabiŭ sakretnyja apieracyi. Ja byŭ u minamiotnym padraździaleńni <…> My tam stralali i dapamahali inšym našym vajavać», - skazaŭ Alaksiej Parašenka, udakładniŭšy, što jaho bataljon byŭ pad Kramatorskam.

Jon taksama abvierh čutki pra toje, što ŭ zonie kanfliktu jaho «achoŭvaŭ ceły bataljon».

«Ja tudy pajechaŭ dobraachvotnikam, sam napisaŭ zajavu»,— zajaviŭ Parašenka-małodšy. Jon raspavioŭ, što pajechaŭ na Danbas pad inšym proźviščam — Anisienka, «kab nie padviarhać niebiaśpiecy ludziej, jakija buduć vakoł mianie».

Piatro Parašenka paviedamiŭ, što jaho syn Alaksiej vajuje na ŭschodzie Ukrainy, u intervju telekanału CNN ŭ vieraśni.

«Moj syn tam… Jon pajšoŭ tudy pa ŭłasnaj voli i kamanduje artyleryjskaj častkaj», — skazaŭ prezident Ukrainy. Za papiarednija try tydni, jak zajaviŭ tady prezident, va ŭzvodzie jaho syna zahinuli try bajcy. «Heta vielmi mocny sihnał, jaki daje zrazumieć (mnie) jak prezidentu, hramadzianinu i baćku, nakolki niebiaśpiečny hety praces i jak važna ŭstanavić mir na hetaj terytoryi», — skazaŭ Parašenka.

Upieršyniu infarmacyja ab udziele Alaksieja Parašenki ŭ kanflikcie źjaviłasia ŭ kancy žniŭnia.

Starejšy syn ukrainskaha lidara byŭ abrany deputatam Viarchoŭnaj rady pa mažarytarnaj akruzie ŭ Vińnickaj vobłaści pa vynikach vybaraŭ, jakija prajšli 26 kastryčnika.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?