Navat kali demakratyčnyja siły nie bačać mahčymaści vyłučeńnia adzinaha kandydata ŭ prezidenty na vybarach 2015 hoda, važna zachavać adzinstva.

Pra heta było zajaŭlena na pasiadžeńni nacyjanalnaj rady arhkamiteta pa stvareńni partyi «Biełaruskaja chryścijanskaja demakratyja» 29 listapada ŭ Minsku. 

Dla dasiahnieńnia adzinstva pry adsutnaści damoŭlenaści ab vyłučeńni adzinaha kandydata BCHD prapanoŭvaje zamiest Kanhresa demakratyčnych sił pravieści Kanhres nacyjanalnaha adzinstva, na jakim pryniać sumiesnuju płatformu dziejańniaŭ u prezidenckaj kampanii 2015 hoda. 

U toj ža čas u BCHD usio ž spadziajucca, što siamiorcy apazicyjnych struktur udasca dasiahnuć damoŭlenaściaŭ ab vyłučeńni adzinaha kandydata. Zhodna z pazicyjaj BCHD adnosna praviadzieńnia Kanhresa demakratyčnych sił, zaćvierdžanaj siońnia, 17 listapada pradstaŭniki BCHD, Partyi BNF, Biełaruskaj sacyjał-demakratyčnaj partyi (Hramada), kampanii «Havary praŭdu» i ruchu «Za Svabodu» padpisali prajekt pracedury, pa jakoj moža być praviedzieny Kanhres demakratyčnych sił. Na sustrečy pradstaŭniki ŭsich siami struktur (razam z Abjadnanaj hramadzianskaj partyjaj i Biełaruskaj partyjaj levych «Spraviadlivy śviet»), jakija ŭdzielničajuć u kansultacyjach, damovilisia da 1 śniežnia 2014 hoda čakać vyznačeńnia pazicyj AHP i «Spraviadlivaha śvietu». Pa ahulnaj damoŭlenaści, rašeńnie ab realizacyi pracedury prymajecca minimum šaściu strukturami ź siami (kansiensus minus 1). Na siońnia tolki ŭ takim farmacie BCHD hatova ŭdzielničać u kanhresie. 

BCHD zaklikaje pradstaŭnikoŭ usich demakratyčnych struktur pryniać sumiesnuju praceduru praviadzieńnia kanhresa. Na dumku arhanizacyi, najlepšym časam praviadzieńnia kanhresa źjaŭlajecca kaniec sakavika — pačatak krasavika 2015 hoda.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?