Alaksandar Miacielica, zasnavalnik biełaruskaj sacyjalnaj sietki Vseti.by z 1 miljonam karystalnikaŭ, čakaje, što ŭ Biełaruś pryjduć «vietlivyja ludzi», a ŭ vypadku źmieny ŭłady Biełaruś pavinna stać častkaju Rasiei.

Niekalki dzion tamu Vseti.by abviaściła, što spyniaje isnavańnie. Ciaham šaści hadoŭ dziejnaści ŭ biełaruskaj sacyjalnaj sietcy było ŭtvorana bolš za 1 miljon akaŭntaŭ.

Miacielica raspaviadaje, što rasčaravaŭsia ŭ biełarusach, jakija chočuć mieć usio i adrazu, dy jašče i biaspłatna, a zamiest ułasnaj sacyjalnaj sietki vybirajuć inšyja, nie biełaruskija:

«Na dziaržaŭnym uzroŭni heta nikomu nie spatrebiłasia, na patryjatyčnym taksama. My chacieli, kab ludzi ŭbačyli ŭ hetym prestyž krainy, bo Biełaruś pavinna mieć svaju sacyjalnuju sietku, a nie tulacca pa fejsbukach, kantaktach i inšych adnaklaśnikach. Svaja sacyjałka — heta infarmacyjnaja biaśpieka krainy».

Sam Miacielica nie chavaje svaich prarasiejskich pohladaŭ, ličyć, što «nijakaj Ukrainy niama», a ŭ Danbasie idzie bratazabojčaja vajna, u jakoj vajuje «vialikaja i adzinaja Rasieja» sama z saboj.

Fota i videa antyŭkrainskaha źmiestu Alaksandar Miacielica publikavaŭ navat u svajoj sacyjalnaj sietcy Vseti.by. Jak jon sam tłumačyć, hetyja roliki źjavilisia ŭ jahonym pryvatnym profili. Što praŭda, z hetaha ž profilu Alaksandar Miacielica jak administratar i zasnavalnik sajtu mieŭ prava dasyłać paviedamleńni na bolš jak miljon akaŭntaŭ abo publikavać infarmacyju pra dziejnaść Vseti.by.

Siabie tryccacihadovy prahramist ź Viciebsku nazyvaje «ruskim i savieckim čałaviekam, jak i kožnaha, chto jašče zaśpieŭ SSSR». Nacyjanalny bieł-čyrvona-bieły ściah ličyć «kalabaracyjanisckim» dy zanadta padobnym da polskaha bieła-čyrvonaha, što «robić ź Biełarusi kaloniju Polščy», a biełaruskuju movu i ŭvohule ličyć prajavaju nacyjanalizmu:

«Miensk, Viciebsk — tut zaŭsiody razmaŭlali pa-rasiejsku. Voś u nas ciapier ahresiŭna idzie reklama pra matčynu movu. Chłopcy, u mianie try pakaleńni prodkaŭ razmaŭlali pa-rasiejsku, jakaja matčyna mova? U mianie była cudoŭnaja nastaŭnica, jakaja navučyła mianie kazać «smačna jeści» zamiest «prijatnoho appietita». Ale jość ludzi, jakija pačynajuć palityzavać biełaruskuju movu, namahajucca ŭbić klin pamiž Rasiejaj i Biełaruśsiu».

Pavodle Alaksandra Miacielicy, pamiž abiedźviuma susiednimi krainami nie pavinna być navat miežaŭ, tamu što Biełaruś pavinna stać častkaju Rasiei. Prahramist nia suprać taho, kab «vietlivyja ludzi» źjavilisia ŭ našaj krainie — bolš za toje, hetyja dziejańni Rasiei jon padtrymaje. Prynamsi ŭ tym vypadku, kali ŭ Biełarusi «hvałtoŭnym čynam źmieniać uładu»:

«Ja harantuju, što jość vielmi vialiki adsotak ludziej, jakija vystupiać za toje, kab tut była Rasieja. Tamu što im bolš ničoha i nia treba», — kaža Alaksandar Miacielica.

Vseti.by spynić svajo isnavańnie ŭžo 30 listapada. Alaksandar Miacielica ličyć, što ŭnikalnaja i adzinaja ŭłasna biełaruskaja sacyjalnaja sietka akazałasia «nikomu nie patrebnaja ni na dziaržaŭnym, ni na patryjatyčnym uzroŭni». Z IT-sfery Miacielica sychodzić nie źbirajecca, ale, jak kaža, biełaruski internet bolš raźvivać nia choča. Svaje idei jon planuje realizavać na «bolš uradlivaj ziamli», siarod mahčymych krainaŭ dziejnaści nazyvaje Kazachstan.

Vseti.by stvaryli ŭ 2008 hodzie jak novuju interaktyŭnuju placoŭku dla naviedvalnikaŭ viciebskaha haradzkoha partału Vitebsk.ws. Sajt pazycyjanavaŭ siabie jak najbujniejšy i najbolš paśpiachovy IT-prajekt u Biełarusi, jaki mieŭsia stać lakalnaj alternatyvaj inšym sacyjalnym sietkam.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?