Suśvietny tydzień pradprymalnictva projdzie ad 17 pa 23 listapada 2014 hoda ŭ 140 krainach śvietu.
U Biełarusi jana źbiare na adnoj placoŭcy lidaraŭ biźniesu, mižnarodnych ekśpiertaŭ, pradstaŭnikoŭ finansavych instytutaŭ, biźnies-sajuzaŭ, ułady, dypłamataŭ. Prahrama Tydnia ŭklučaje ŭ siabie majstar-kłasy, kanfierencyi, dyskusii, konkursy i dastupnaja na gew.by.
18 listapada 2014 u hateli «Reniesans-Minsk» (pr. Dziaržynskaha, 1Je) adbudziecca klučavaja padzieja Tydnia — IV Forum pradprymalnictva.
Spynimsia na asnoŭnych momantach i śpikierach.
Forum pačynajecca z Cyrymonii adkryćcia Suśvietnaha tydnia pradprymalnictva, na jakoj ź vitalnaj pramovaj vystupiać Časovy pavierany ŭ spravach Złučanych Štataŭ Amieryki ŭ Respublicy Biełaruś Skot Roulend, pasoł Vialikabrytanii Brus Baknieł, zaprošany ministr ekanomiki Biełarusi Mikałaj Snapkoŭ.
Dalej prahrama Forumu prapanuje dałučycca da dyskusii na temu «Dostup da finansaŭ dla małoha i siaredniaha biznesu», u jakoj vystupiać pradstaŭniki Minekanomiki Biełarusi, Banka Raźvićcia, BNB-banka, MTBanka, a taksama Suśvietnaha banka i IFC.
— Chočacca adznačyć sustreču z dyrektaram pa markietynhu hrupy kampanij «ALUTECH» Uładzimiram Rybakovym.
Sustreča projdzie ŭ farmacie intervju, i my budziem kazać ab vychadzie na jeŭrapiejski rynak praz kuplu aktyvaŭ. Heta cikavy i pieradavy dośvied dla mnohich kampanij Biełarusi. Zadać svaje pytańni zmohuć i ŭsie, chto naviedaje Forum Suśvietnaha tydnia pradprymalnictva, — raspaviała dyrektar i suzasnavalnik ahienctva «Biźnies-naviny», a taksama suarhanizatar GEW Iryna Juzvak.
U ramkach Forumu pradprymalnictva projduć majstar-kłasy zamiežnych ekśpiertaŭ —
«Kankurencyja ŭ šmatpalarnym śviecie» ad Fiernanda Kartyniesa (IE biźnies-škoła, Ispanija) i LEAN padychodu ad Tobijasa Džojesta (SAP, Hiermanija). Tobias Džojest taksama budzie zadziejničany ŭ panelnaj dyskusii Foruma «Efiektyŭnaja vytvorčaść krok za krokam. Technałohii efiektyŭnych arhanizacyj».
- Što takoje efiektyŭnaja vytvorčaść? Važniej abstalavańnie abo biźnies-pracesy? Padčas dadzienaj dyskusii my pahavorym ab ułasnych raspracoŭkach biełaruskich kampanij, ab technałohijach, jakija pierajmajucca ajčynnymi kampanijami, a taksama technałohijach, jakija raspracoŭvajuć sami biełaruskija kampanii, — raspaviała Iryna Juzvak.
18 listapada na Forumie buduć šmat havaryć ab publičnaści kampanij, farmiravańni brenda i PR-technałohijach.
U hetych dyskusijach voźmuć udzieł takija «akuły biznesu», jak staršynia ahulnaha schodu ŭdzielnikaŭ TAA «TUT.BY miedyja», uładalnik UP «Nadziejnyja prahramy», suzasnavalnik i saŭładalnik najbujniejšaha internet-resursu Biełarusi TUT.BY Juryj Zisier, kiraŭnik PR-hrupy mabilnaha apieratara MTS Taćciana Kurbat, dyrektar markietynhavaj i PR-kampanii TAA «Ahienctva dziełavych suviaziej» Valancin Łopan i mnohija inšyja.
- Padčas panelnaj dyskusii my pastarajemsia adkazać na pytańni, što takoje publičnaść, dzie jaje miežy, ci patrebna jana kampanijam, jakija jość ryzyki i pieravahi. My čakajem cikavaha hościa z Rasii — hiendyrektara AAT «Smart Brokier» Andreja Husieva. Kampanija źjaŭlajecca samym bujnym listynhavym ahientam Maskoŭskaj biržy, — patłumačyła Iryna Juzvak.
Adznačym, što zhodna z zakanadaŭstvam, niekatoryja kampanii Biełarusi abaviazanyja pradstaŭlać finansavyja źviestki dla publičnaha dostupu. Astatnija kampanii nie ličać patrebnym hetaha rabić, padryvajučy tym samym davier patencyjnych inviestaraŭ i akcyjanieraŭ. Na dumku dyrektara markietynhavaj i PR-kampanii TAA «Ahienctva dziełavych suviaziej» Valancina Łopana, siońnia, kali kazać pra publičnaść, treba, u pieršuju čarhu, raźviejvać źviazanyja ź joj mify.
Kali kazać pra PR-technałohii, to pabudavać pryvabny brend kampanii siońnia taksama zadača važnaja i niaprostaja, ličyć kiraŭnik PR-hrupy mabilnaha apieratara MTS Taćciana Kurbat.
— Kankurencyja siońnia zaškalvaje, internet raźvivajecca i zachoplivaje ŭsio bolš rozumaŭ, a chutkaść pašyreńnia infarmacyi nie pakidaje šancaŭ. Spakoj i ŭpeŭnienaść zachoŭvajuć tolki tyja brendy, jakija pakłapacilisia ab ułasnaj reputacyi zahadzia abo jakija ŭžo pryjšli da razumieńnia važnaści vybudoŭvańnia daviernych adnosin z aŭdytoryjami.
Pavodle acenak ekśpiertaŭ, «košt» reputacyi moža dasiahać 30% ad kapitalizacyi kampanii. I ihnaravać značnaść stvareńnia cełasnaha brenda siońnia — bluźnierstva ŭ adnosinach da svajho biźniesu. Choć niaredkija vypadki, kali kiraŭniki kampanii ŭsurjoz usprymajuć tolki ekanamičnyja pakazčyki, ličačy brendynh i rieputacyjny mieniedžmient durnicami. Ja ŭpeŭniena, mnohija z udzielnikaŭ panelnaj dyskusii buduć ździŭleny tym, nakolki stratehična značnym napramkam źjaŭlajecca reputacyja, jak jana ŭpłyvaje na kapitalizacyju biźniesu. A hałoŭnaje, jak reputacyja moža prynieści całkam materyjalnuju vyhadu, jakaja aceńvajecca ŭ kankretnych ličbach, - raspaviała Taćciana.
U ramkach panelnaj dyskusii «Biźnies-madeli, jak asnova karparatyŭnaha imidžu» u jakaści śpikiera i maderatara vystupić upraŭlajučy partnior, dyrektar, kiraŭnik napramku stratehičnaha raźvićcia, biźnies-trenier kansałtynhavaj hrupy «Tut i Ciapier» Alaksandr Pańkoŭ.
- Ja chaču danieści da aŭdytoryi prostuju reč, što hałoŭnym instrumientam u pabudovie pośpiechu na bližejšyja dziesiać hadoŭ stanie vybar pravilnaj biźnies-madeli.
Pradprymalnikam niadrenna było b razabracca z klučavymi paramietrami biźnies-madelaŭ, bo ŭsie «fiški», jakija nam raspaviadajuć ab prodažach, kiravańni piersanałam, tajm-mieniedžmiencie - heta dobra, ale heta vielmi razroźnienyja paniatki. Kab skłałasia poŭnaja karcina, treba pramalavać samu biźnies-madel, a biznes-madel — heta sposab stvareńnia kaštoŭnaści kampanii dla klijenta z metaj zdabyćcia prybytku, — upeŭnieny Alaksandr.
— Ja budu kazać ab 8 asnoŭnych etapach pabudovy hetaj madeli, a taksama pakazvać nahladnyja prykłady paśpiachovych i niepaśpiachovych biźnies-madelaŭ na biełaruskim, rasijskim i suśvietnym rynku. U chodzie dyskusii my pasprabujem adkazać na pytańni, čamu źjaŭlajucca niepaśpiachovyja biźnies-madeli i što nieabchodna zrabić pradprymalniku, kab biznes-madel była efiektyŭnaja doŭhija hady.
Pa słovach Alaksandra Pańkova, Suśvietny Tydzień Pradprymalnictva — heta dobry matyvacyjny pasył dla adkryćcia ŭłasnaj spravy, a taksama dobraja placoŭka dla abmienu vopytam pamiž zamiežnymi i biełaruskimi partniorami. Ale samaje hałoŭnaje, što padobnaha rodu mierapryjemstvy farmujuć razumieńnie ŭ biełaruskaha biznesu, što być paśpiachovym možna ŭ luboj krainie.
Daviedacca bolš padrabiazna ab mierapryjemstvie i zarehistravacca možna na sajcie gew.by.
Adznačym, što Suśvietny Tydzień Pradprymalnictva — heta samaja maštabnaja ŭ śviecie sustreča pradprymalnikaŭ i startapaŭ, što realizujuć idei, jakija spryjajuć ekanamičnamu prahresu i dabrabytu.
Kožny listapad na praciahu adnaho tydnia GEW natchniaje ludziej pa ŭsim śviecie praź mierapryjemstvy łakalnaha, nacyjanalnaha i suśvietnaha ŭzroŭniu, skiravanyja na raźvićcio navatarskaha i pradprymalnickaha patencyjału.
U Biełarusi arhanizatarami mierapryjemstva vystupili dziełavy partał Bel.biz, infarmacyjna-analityčnaje ahienctva «Biźnies-naviny» i Respublikanskaja kanfiederacyja pradprymalnictva, hienieralnym partnioram GEW ŭ Biełarusi vystupiła Ahienctva ZŠA pa mižnarodnym raźvićci.
