U kastryčniku nasielnictva kupiła zamiežnaj valuty na 944,8 młn. dalaraŭ, pradało 851,1 młn. dalaraŭ, śviedčać danyja Nacyjanalnaha banka.
Takim čynam, u kastryčniku čystaja kupla (pieravyšeńnie abjomu popytu nad prapanovaj) nasielnictvam zamiežnaj valuty skłała $93,7 młn.
Varta adznačyć, što ŭ paraŭnańni ź vieraśniem kupla nasielnictvam zamiežnaj valuty vyrasła ŭ kastryčniku na 82 młn. dalaraŭ, u toj čas jak abjom prodažu skaraciŭsia na 45,2 młn. dalaraŭ.
Jak vynik, kali ŭ vieraśni nasielnictva źjaŭlałasia čystym pradaŭcom zamiežnaj valuty (pradavała bolš, čym kuplała), to ŭ kastryčniku — čystym pakupnikom.
Da lipienia nasielnictva amal usiu pieršuju pałovu hoda vystupała čystym pakupnikom na valutnym rynku — nabyvała valuty bolš, čym pradavała.
Źnižeńnie popytu na zamiežnuju valutu z boku nasielnictva ŭ letnija miesiacy ekśpierty tłumačyli pastupleńniem u krainu kredytnych resursaŭ na padtrymańnie zołatavalutnych reziervaŭ, što dazvoliła źnizić uzrovień devalvacyjnych čakańniaŭ u hramadstvie.
Nahadajem, u kancy maja paśla padpisańnia Biełaruśsiu Dahavora ab Jeŭrazijskim ekanamičnym sajuzie Rasija vydzieliła krainie kredyt na 2 młrd. dalaraŭ.
Razam z tym, vosieńniu popyt na zamiežnuju valutu z boku nasielnictva znoŭ staŭ uzrastać. Jak paviedamlałasia raniej, u vieraśni ŭ paraŭnańni sa žniŭniem popyt nasielnictva na zamiežnuju valutu vyras na 75,1 młn. dalaraŭ, i ŭ kastryčniku tendencyja pavieličeńnia abjomu kupli zamiežnaj valuty fizičnymi asobami pradoŭžyłasia.
