Kancler Hiermanii Anhieła Mierkiel zajaviła, što novyja ekanamičnyja sankcyi suprać Rasii ŭ suviazi ukrainskim kryzisam pakul nie płanujucca.
Tym nie mienš, padkreśliła jana, moža być pašyrany «čorny śpis» čynoŭnikaŭ, jakim budzie zabaronieny ŭjezd u krainy Jeŭrasajuza. U pryvatnaści, vizavaja zabarona moža zakranuć novaabranych kiraŭnikoŭ samaabvieščanych Danieckaj i Łuhanskaj «narodnych respublik» na ŭschodzie Ukrainy, paviedamiła Mierkiel.
Pry hetym hiermanski kancler zaŭvažyła, što jaje turbuje nievykanańnie pahadnieńnia ab pieramirji, zaklučanaha 5 vieraśnia ŭ Minsku. «Značnaja častka minskich damoŭlenaściej prosta nie vykonvajecca», — skazała Anhieła Mierkiel na pres-kanfierencyi ŭ Bierlinie.
Tłumačačy rašeńnie nie razhladać pašyreńnie sankcyj suprać Rasii, kiraŭnik urada Hiermanii zaŭvažyła: «My skancentravany na zimie i na humanitarnaj situacyi, a taksama na dasiahnieńni realnaha pieramirja».
Adnačasova Arhanizacyja pa biaśpiecy i supracoŭnictvie ŭ Jeŭropie papiaredziła, što situacyja na ŭschodzie Ukrainy praciahvaje paharšacca.
