Paśla katastrofy samalota MiH-29 61-j źniščalnaj avijabazy Zachodniaha apieratyŭna-taktyčnaha kamandavańnia VPS i vojskaŭ SPA Uzbrojenych sił Biełarusi prypynienyja paloty ŭsioj vajennaj avijacyi biełaruskaj armii, paviedamili ŭ vajennym viedamstvie.
Kali budzie źniataja zabarona na paloty inšych typaŭ samalotaŭ, za vyklučeńniem źniščalnikaŭ MiH-29, pakul nieviadoma.
Nahadajem, katastrofa MiH-29 61-j źniščalnaj avijabazy zdaryłasia 11 listapada pryblizna ŭ 13.30 kala vioski Litva Lachavickaha rajona Bresckaj vobłaści. Lotčyk katapultavaŭsia. U vyniku padzieńnia samalota paciarpiełych i razbureńniaŭ niama. Piłot, znojdzieny siłami pošukava-ratavalnaj kamandy, nie paciarpieŭ.
Na miescy katastrofy pracujuć śledčyja i vajennyja. Dla kaardynacyi dziejańniaŭ tam ža znachodzicca pieršy namieśnik staršyni Śledčaha kamiteta Alaksiej Vołkaŭ.
Varta adznačyć, što infarmacyi ab adnaŭleńni palotaŭ Su-25 paśla katastrofy šturmavika 30 vieraśnia hetaha hoda pakul nie było.
Ci zakranie zabarona na paloty bajavoj avijacyi i rasijskija Su-27, jakija znachodziacca na aeradromie 61-j źniščalnaj avijabazy, nieviadoma.
