Sa žniŭnia 2009 hoda — daty pieršaj katastrofy ŭ biełaruskaj vajennaj avijacyi z čałaviečymi achviarami paśla bolš jak 12-hadovaha paśpiachovaha pieryjadu — VPS i vojski SPA Biełarusi stracili vosiem lotčykaŭ i siem bajavych mašyn.
30 žniŭnia 2009 padčas avijašou ŭ polskim Radamie raźbiŭsia «Su-27» 61-j źniščalnaj avijabazy. Lotčyki-snajpiery, piłatavaŭšyja jaho, — namieśnik kamandujučaha Zachodnim apieratyŭna-taktyčnym kamandavańniem VPS i vojskaŭ SPA Alaksandr Marficki i namieśnik kamandzira 61-j źniščalnaj avijabazy Alaksandr Žuraŭlevič — zahinuli.
21 krasavika 2010 u rajonie Ružan (Pružanski rajon, Bresckaja vobłaść) padčas ažyćciaŭleńnia płanavaha palotu va ŭmovach abmiežavanaj bačnaści pry vykanańni manieŭru pavyšanaj składanaści zdaryłasia sutyknieńnie ŭ pavietry dvuch samalotaŭ «MiH-29» 927-j źniščalnaj avijabazy. U vyniku adna z mašyn była zhublenaja, lotčyk katapultavaŭsia. Druhi źniščalnik zdoleŭ viarnucca na aeradrom bazavańnia.
23 vieraśnia 2010 u Hancavickim rajonie Bresckaj vobłaści paciarpieŭ katastrofu «MiH-29» 61-j źniščalnaj avijabazy. Ekipaž vykonvaŭ elemienty piłatažu pavyšanaj składanaści na małych vyšyniach. Zahinuli lotčyk 1-ha kłasa, kamandzir avijacyjnaj eskadrylli padpałkoŭnik Siarhiej Kavalenka i lotčyk 2-ha kłasa, namieśnik kamandzira avijacyjnaha źviana major Alaksandr Žyhajła.
29 listapada 2011 u 19.45 padčas vykanańnia płanavych vučebna-trenirovačnych palotaŭ pry zachodzie na pasadku ŭ rajonie aeradroma Pružany zdaryłasia krušeńnie viertalota «Mi-24» 181-j bajavoj viertalotnaj bazy. Try členy ekipaža zahinuli.
12 červienia 2012 u Hrodzienskaj vobłaści pry vykanańni płanavych palotaŭ u rajonie avijacyjnaha palihona raźbiŭsia samalot «Su-25» 116-j šturmavoj avijabazy. Zahinuŭ piłot — vajenny lotčyk 1-ha kłasa padpałkoŭnik Mikałaj Hrydnieŭ.
30 vieraśnia 2014 pry praviadzieńni płanavych palotaŭ raźbiŭsia «Su-25» 116-j šturmavoj avijabazy. Lotčyk, pierakanaŭšysia, što trajektoryja padziejańnia samalota znachodzicca pa-za nasielenymi punktami, katapultavaŭsia. Jon byŭ znojdzieny siłami pošukava-ratavalnaj kamandy.
Z 1970 pa 1997 u vajennaj avijacyi, jakaja dysłakavałasia na terytoryi Čyrvanaściažnaj Biełaruskaj vajennaj akruhi, było zafiksavana zvyš 100 avijacyjnych zdareńniaŭ, u jakich zahinuli bolš za 60 čałaviek.
Apošnimi ŭ hetym šerahu byli katastrofy «Su-27» i «Su-17» u rajonie Baranavič 23 maja 1996 i 19 maja 1997-ha. U pieršaj zahinuŭ načalnik pavietrana-ahniavoj i taktyčnaj padrychtoŭki 61-j źniščalnaj avijabazy padpałkoŭnik Uładzimir Karvat, jaki staŭ pieršym Hierojem Biełarusi (paśmiarotna). Heta apošniaje avijazdareńnie, vyniki rasśledavańnia jakoha stali viadomyja hramadskaści.
U druhoj katastrofie zahinuŭ načalnik stancyi lotnych vyprabavańniaŭ 558-ha avijaramontnaha zavoda padpałkoŭnik Siarhiej Pahraban. Pavodle nieaficyjnaj infarmacyi, piłot pieraacaniŭ mahčymaści samalota i svaje ŭłasnyja.
Da ŭžo pieraličanych katastrof dziaržaŭnaj avijacyi na terytoryi Biełarusi možna dadać krušeńnie ŭ Pastaŭskim rajonie Viciebskaj vobłaści 20 kastryčnika 2011 hoda viertalota orhanaŭ pahraničnaj słužby Biełarusi Eurocopter AS 355NP Ecureuil. Na borcie znachodziłasia piać čałaviek: dva členy ekipaža (Ihar Skvarcoŭ 1965 hoda naradžeńnia i Andrej Piakarski 1979 hoda naradžeńnia) i zdymačnaja hrupa teleradyjoabjadnańnia «Sajuz» (Julija Šaternik 1983 hoda naradžeńnia, Vital Pračkoŭski 1974 hoda naradžeńnia i Siarhiej Šamałaŭ 1972 hoda naradžeńnia). Usie jany zahinuli. «Jeŭrakopter» vykonvaŭ płanavy palot pa achovie dziaržaŭnaj miažy.
