Prezident Rasii Uładzimir Pucin padaryŭ 9 listapada kiraŭniku Kitajskaj Narodnaj Respubliki Si Czińpinu smartfon YotaPhone 2 padčas svajho vizitu ŭ Kitaj.
Jak raspavioŭ RIA «Novosti» pres-sakratar prezidenta Dźmitryj Piaskoŭ, u smartfon była admysłova zapampavanaja simvolika Rasii, Kitaja i Azijacka-Cichaakijanskaha ekanamičnaha supracoŭnictva.
Paśla naviny ab padarunku hałava Čačenskaj respubliki Ramzan Kadyraŭ, viadomy jak karystalnik iPhone, daručyŭ zamović sabie YotaPhone 2.
Smartfony YotaPhone u rasijskaj presie niaredka nazyvajuć «rasijskimi ajfonami». «Jotafony» pijarać i rasijskija palityki. U śniežni 2013 hoda sa smartfonam aznajomiŭsia premjer-ministr Rasii Dźmitry Miadźviedzieŭ, jaho reakcyja była: «Karaciej, Apple napružyŭsia». Hałava rasijskaha ministerstva zamiežnych spraŭ Siarhiej Łaŭroŭ zajaŭlaŭ, što karystajecca YotaPhone u mai 2014-ha.
Hałoŭnaja asablivaść «jotafonaŭ» — dva ekrany.
Pieršy — zvykły dla smartfonaŭ LCD-ekran, druhi — čorna-bieły E-ink-ekran, tak zvanaja «elektronnaja papiera». YotaPhone 2 maje charaktarystyki smartfonaŭ-fłahmanaŭ pačatku 2014 hoda: Android 4.4, čyp Spandragon 800 z 4-jadziernym pracesaram, asnoŭny 4,7»-FullHD-ekran, druhi E-ink-ekran (z padśvietkaj) toj ža dyjahanali z razroźnieńniem 960x540, kamiery na 8 i 2 Mp.
Smartfony YotaPhone składajucca z kitajskich detalaŭ i sabrany ŭ Kitai.
Za pieršy miesiac prodažaŭ u kancy 2013 hoda było pastaŭlena ŭsiaho blizu 10 tysiač aryhinalnych YotaPhone, akramia Rasii jon paźniej staŭ pradavacca ŭ Vialikabrytanii i Arabskich Emiratach. YotaPhone 2 raźličany na mižnarodny rynak, start jaho prodažaŭ zapłanavany na śniežań 2014 hoda, aryjentyrovačnaja cana — 700 dalaraŭ.
