Śfiera dziejnaści padazravanaha ŭ špijanažy dla Biełarusi žychara Vilni całkam nie była źviazana z sakretnaściu, śćviardžaje pradstaŭnik dziaržaŭnaha pradpryjemstva Oro navigacija Edmundas Hanusaŭskas, u jakim pracavaŭ padazravany.
«Jaho śfiera dziejnaści nie była źviazana z sakretnaściu. Jon — technik Enierhietyčnaha adździeła. Jaho kampietencyja — kabieli, sistemy suviazi, jon vykonvaŭ, pa sutnaści, abaviazki elektryka — ažyćciaŭlaŭ pravierki, nahlad, ramont, tamu vielmi dziŭna, što jon moh niešta źbirać abo pieradavać», — skazaŭ u pieradačy «Aktualny čas» na radyjo Žinių radijas E.Hanusaŭskas.
Pa dadzienych Litoŭskaha biuro kryminalnaj palicyi, padazravany ŭ svaim kabiniecie tajemna fatahrafavaŭ dakumienty i pieradavaŭ ich u Hałoŭnaje raźviedvalnaje ŭpraŭleńnie Hienieralnaha štaba ŭzbrojenych siłaŭ Biełarusi. Hanusaŭskas śćviardžaje, što ŭ padazravanaha navat nie było kabinieta.
«Pierš za ŭsio, u jaho, jak u technika, nie było kabinieta. Dzie jon heta rabiŭ, ja navat tam nie byŭ — u padvale jość pamiaškańni dla techničnych rabotnikaŭ», — skazaŭ jon.
Pa dadzienych Litoŭskaha biuro kryminalnaj palicyi, padazravany źbiraŭ infarmacyju ab hramadzianskaj i vajennaj avijacyi. Pa słovach supracoŭnikaŭ, asobnaje rasśledavańnie pačata i ŭ suviazi ź dziejańniami jašče adnaho hramadzianina Litvy, ale jano jašče nie skončana, tamu infarmacyja nie pradastaŭlajecca.
Hanusauskas śćviardžaje, što dla kampanii Oro navigacija viestka ab padazravanym była niečakanaj.