Užo siońnia, 7 listapada, u Minsku čakajucca pieršyja paśla pierapynku daždžy.
A heta značyć, što smoh, jaki apanavaŭ biełaruskuju stalicu i inšyja rehijony krainy, pavinien syści. Ciopłaje, ale daždžlivaje nadvorje, sinoptyki abiacajuć taksama bližejšymi dniami, paviedamlaje interfax.by.
Anamalna ciopłaje dla listapada nadvorje spryjała tamu, što apošni tydzień u Biełarusi nazirałasia inviersija - mietearałahičnaje źjava, pry jakoj pavietra nie moža viertykalna pieramiaščacca, a zapasicca ŭnizie, i takim čynam utvarajecca smuha i smoh. Uzmacnieńniu hetaj źjavy spryjajuć pradukty dziejnaści haradoŭ - aŭtamabili i pradpryjemstvy, a taksama tarfianyja pažary, jakija ŭźnikajuć na palach niedaloka ad miehapolisaŭ.
Ludzi panikavali, ekołahi raskazvali pra naturalnaść inviersii, sinoptyki abiacali daždžy, pry źjaŭleńni jakich smoh pavinien niezvarotna syści, a lekary papiaredžvali astmatykaŭ i ludziej z asłablenym zdaroŭjem ab mahčymym paharšeńni stanu. Im raili mienš špacyravać, mieć pry sabie inhalatary i čaściej pravodzić doma vilhotnuju ŭborku.
Miž tym smoh, jaki zdavałasia minuŭ, viarnuŭsia ŭ biełaruskuju stalicu. Heta pryznali nie tolki prostyja žychary horada, ale i adpaviednyja słužby, što viaduć nazirańni i kantrol za čyścinioj pavietra. Pavodle źviestak Respublikanskaha centra radyjacyjnaha kantrolu i manitorynhu navakolnaha asiarodździa, «mietearałahičnyja ŭmovy, jakija skłalisia ŭ pieryjad z 30 kastryčnika da 5 listapada, spryjali rostu zapylenaści pavietra».
Kali daždžy da nas pryjduć, jak heta i čakajecca, smoh nad Minskam užo bližejšymi dniami moža pieratvarycca z naturalnaha stanu ŭ histaryčnuju źjavu. I prahnoz nadvorja ŭ hetym płanie raduje: apadki buduć - kažuć sinoptyki.
Ale čakać varta nie tolki daždžoŭ, ale i dalejšaha paciapleńnia. A značyć, čysta tearetyčna, vyklikany inviersijaj zmoh moža jak syści dziakujučy daždžam, tak i viarnucca, kali pa-sapraŭdnamu vosieńskaje nadvorje nie prydzie ŭ Biełaruś samym bližejšym časam. Da pačatku kalandarnaj zimy, darečy, zastałosia krychu bolš za try tydni.
Śpiecyjalisty, aceńvajučy pierśpiektyvu raźvitacca z dakučlivym usim smoham užo bližejšymi dniami, taksama aściarožnyja ŭ prahnozach. Jany kažuć pra važnaść mocnych daždžoŭ i paryvaŭ vietru, a nie prosta «jakich-niebudź apadkaŭ», jakija mohuć asłabić smoh, ale nie pazbavić ad jaho całkam.
Miž tym, pavodle źviestak aficyjnaha sajta Hidramieteacentra Biełarusi pogoda.by, u piatnicu, 7 listapada, umovy nadvorja na terytoryi Biełarusi budzie vyznačać ciopłaja pavietranaja masa, jakaja pastupaje z paŭdniovaha zachadu Jeŭropy, pa paŭnočna-zachodniaj pałovie krainy adabjecca ŭpłyŭ atmaśfiernych frantoŭ. Čakajecca vobłačnaje z prajaśnieńniami nadvorje, a ŭ paŭnočna-zachodniaj pałovie krainy čakajucca karotkačasovyja daždžy.
Maksimalnaja tempieratura pavietra dniom składzie +8.. + 14 °C, a ŭ paŭdniovych rajonach Biełarusi słupok termomietra padymiecca da +15.. + 19 °C.
Nastupnyja dvoje dzion, 8-9 listapada, zachavajecca ciopłaje nadvorje, abiacajuć sinoptyki. Daždžy projduć pieravažna na paŭnočnym zachadzie krainy, adnak ich vierahodnaść vialikaja i ŭ inšych rehijonach Biełarusi. Umovy nadvorja na terytoryi našaj krainy ŭ hetyja dni budzie vyznačać atmaśfierny front, jaki ruchajucca z Polščy i ciopłyja pavietranyja masy, jakija pastupajuć z poŭdnia Jeŭropy.
