Hleb Łabadzienka, žurnalist, paet i vykładčyk kursaŭ «Mova Nanova» (biaspłatnyja kursy biełaruskaj movy) staŭ pravodzić aŭtarskija ekskursii pa Biełarusi. Užo adbylisia vandroŭki pa miescach Bykava i Baradulina, da Radziviłaŭ u Niaśviž.

U hetuju piatnicu čakajecca prahrama «Mova Nanova zaprašaje da kniazia Alhierda», a 27 śniežnia kaladnaja ekskursija da Mickieviča. My parazmaŭlali z Hlebam nakont asablivaściej i pieravah aŭtarskaha padychoda da ekskursijnych prahram.

– Skažycie? kali łaska, ekskursii – heta svojeasablivy praciah «Movy Nanova» ci kankretna vaša asabistaja dziejnaść?

– Da nas pastupiła prapanova ad turystyčnaj kampanii «Vijapol» stvarać ekskursijnyja prahramy. I my, na kursach «Mova nanova», uspryniali jaje z entuzijazmam. Bo dla nas heta nastupnaja mahčymaść pašyryć śfieru ŭžyvańnia movy.

Jak vyśvietliłasia, ludzi zapisvalisia na ekskursii ŭ tym liku i dla taho taho, kab pasłuchać ich na biełaruskaj movie. Zrazumieła, što ŭ Niaśvižy, naprykład, kudy my jeździli, mnohija byvali. Ale, pa-pieršaje, ekskursii byli na rodnaj movie, a, pa-druhoje, možna było ŭbačyć davajennyja fotazdymki Radziviłaŭ, jakija ja źbiraju. Ludzi atrymali, nie viedaju, ci cikavuju, ale dakładna admietnuju ekskursiju.

– Kaho cikaviać ekskursii? Usio ž taki na kursy «Mova Nanova» ŭ asnoŭnym prychodzić moładź, toje samaje z maršrutami?

 Na ekskursii źbirajecca starejšaja aŭdytoryja. Moładź vielmi časta nie maje hrošaŭ. Kursy ŭsio ž biaspłatnyja, a košt ekskursij vyznačaje turfirma. Ciapierašniaja, naprykład, na ceły dzień, kaštuje 370 tysiač, ale dla studentaŭ kursaŭ praduhledžany źnižki. Vielmi pryjemna, što pryjazdžajuć ludzi z druhich haradoŭ. U minuły raz byli turysty z Žodzina, Babrujska.

– Na vašu dumku, ci mahčyma zrabić niekatoryja ekskursija i maršruty bolš papularnymi za košt aŭtarskaha padychodu? Ci mahčyma takoje, što turysty buduć jechać, kab pasłuchać kankretnaha čałavieka, a nie dziela miesca?

– Ja pierakanany, što heta mahčyma. Ja voś, naprykład, užo šmat dzie byvaŭ. I mianie moža pryvabić ekskursija, tolko kali jaje pravodzić vielmi cikavy dla mianie hid. Naprykład, Siarhiej Chareŭski, znaŭca našaj architektury. Ja viedaju, što jon raskaža cikava, nie nudna.

Tamu i atrymlivajecca, što aŭtarskija ekskursija asabliva cikavyja dla tych, chto ŭžo šmat pabačyŭ. Na našych ekskursijach vyśviatlajecca, što mnohija ŭžo šmat dzie pabyvali z turystyčnymi hrupami. A da nas jany dałučajucca, bo spadziajucca pačuć admietnyja cikavostki. Kali ja rychtujusia, starajusia hladzieć nie tolki aficyjnyja krynicy, ale i šmat inšych. U tym liku vykarystoŭvaju bajki, što čuŭ ad miascovych ludziej. Bo na miescach, dzie pravodžu ekskursii, užo šmat razoŭ byvaŭ. I ŭsio heta cikava ludziam.

Mała raskazać, što kaścioł pabudavany ŭ takim-ta hodzie. Treba niekudy spuścicca, niekudy padniacca, pašukać niešta tajamničaje, pakazać toje, što zvyčajna nie ŭklučajecca ŭ maršruty.

– Raskažycie, što čakajecca na maršrucie ŭ hetu piatnicu?

– Maršrut «Mova Nanova zaprašaje da kniazia Alhierda» pačniecca z kaścioła XVIII st u vioscy Bienica Maładziečanskaha r-na. Jon nie časta ŭklučajecca ŭ ekskursii. Heta ahromny kaścioł, jaki staić ŭ maleniečkaj vioscy i vyhladaje zaniadbanym. Ale, kali zachodziš unutr, bačyš pabieleny kaścioł z rośpisami na kupale. Čamu heta varta pakazvać? Kab ludzi pabačyli, u jakim stanie što zachoŭvajecca.

U kožnaj ekskursii ŭ nas jość hałoŭny abjekt. Na hetym maršrucie heta Kreŭski zamak. Paśla jaho my zajazdžajem u ŭ Halšanski zamak. My nie chacieli stavić razam dva takija vialikija abjekty, ale ŭličvajučy, što Halšany ŭ nas pa darozie, vyrašyli zajechać. Potym taksama Traby, Iŭje – horad 4 relihij, Lipniški, kaścioł z mazaikami ŭ Subotnikach, i zaviaršajecca ŭsio ŭ Žamysłavie. Tam staić ahromny pałac Umiastoŭskich, jaki pabudavaŭ prychilnik apošniaha karala Rečy Paspalitaj. Hety pałac – krychu źmieńšanaja kopija varšaŭskaha pałaca ŭ Łazienkach. Navat mebla dla pałacaŭ zakazvałasia na adnoj fabrycy.

27-ha śniežnia pajedziem u Navahradak i Zavośsie – pabačym dva muziei Mickieviča, pahladzim zamki ŭ Navahradku i ŭ Lubčy.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?