Na sustrečy z delehacyjaj biełaruskaj apazicyi prezident ZŠA Džordž Buš raspaviadaŭ historyi sa svajho žyćcia i paprasiŭ doŭha nie kazać pra padziei ŭ Biełarusi, bo vydatna ŭsio viedaje.

U intervju Racyi Alaksandr Milinkievič dzielicca ŭražańniami ad vizitu ŭ ZŠA.

‑ Spadar Milinkievič, užo piać dzion delehacyja demakratyčnych sił Biełarusi znachodzicca ŭ ZŠA. Adbyłasia vašaja sustreča z Džoržam Bušam. Jakija vašyja ahulnyja ŭražańni ad vizytu?

‑ Ja b nazvaŭ hety vizit partniorskim, a nie farmalnym. Kaniešnie, pryjom u Džodža Buša ci Kandalizy Rajs — heta vialikaja maralnaja padtrymka pracesaŭ demakratyzacyi ŭ Biełarusi. Ale ŭsio ž — hetyja sustrečy partniorskija. I Buš, i Rajs vydatna viedajuć pra situacyju u našaj krainie. Navat prasili doŭha nie raspaviadać pra toje, što adbyvajecca, a vyrašać, što my možam rabić razam. Siarod taho, pra što my razmaŭlali, na pieršym miescy byli miedyi. Kazali, što ŭsie jany patrabujuć padtrymki, nie moža być pryjarytetaŭ. Viałosia pra maleńkija i bujnyja haziety, pra radyjostancyi, pra telebačańnie. Toje, što jość, treba padtrymać.

‑ Jak budzie ździajśniacca hetaja padtrymka?

‑ My viedajem, jak heta ździajśniać i jak padtrymlivać hetyja ŚMI. Hałoŭnaje, kab było palityčnaje rašeńnie. Zrazumieła, što ŭ palitycy padtrymki pravoŭ čałavieka ŭ śviecie ŭ Złučanych Štataŭ prablem šmat. Biełaruś — tolki adna z takich prablemnych krain. Ale ŭ płanie padtrymki haziet, radyjo i telebačańnia prablem nie budzie.

‑ Jak na Vašuju dumku, ci nazirajecca peŭnaje parazumieńnie pazicyj pa situacyi ŭ Biełarusi pamiž vami, amierykanskim kiraŭnictvam i kiraŭnictvam Jeŭrapiejskaha sajuzu?

‑ ZŠA — kraina histaryčna jašče maładaja. Takuju mahutnuju dziaržavu amierykancy zbudavali dziakujučy tamu, što była zroblenaja staŭka na maralnyja kaštoŭnaści: svaboda, demakratyja, pravy čałavieka. My zmahajemsia za toje ž samaje. Tamu nam vielmi prosta parazumiecca. ZŠA sapraŭdy ličać svajoj misijaj patrymku demakratyi va ŭsim śviecie. I tut źmieny palityki nie adbyvajecca. Inšaja sprava ŭ pryarytetach. U Jeŭropie Biełaruś — biezumoŭny pryarytet. Darečy, my razmaŭlali pra nieabchodnaść ciesnaha supracoŭnictva pamiž krainami ES i ZŠA, što da situacyi ŭ Biełarusi. Jany pavinny vystupać adnym frontam. Siońnia budzie sustreča z trojkaj Jeŭrasajuza. Učora ŭ nas była sustreča z ambasadaram Niamieččyny tut. Tak što padčas našaha vizitu tema supracoŭnictva Jeŭropy ź Biełaruśsiu taksama prystuničaje.

‑ Raspaviadzicie, kali łaska, padrabiaźniej pra sustreču amierykanskim prezidentam Džordžam Bušam. Jakija ŭ Vas uražańni ad jaho, jak ad čałavieka i palityka.

‑ Ja ź im sustrakajusia ŭžo ŭ treci raz. Heta była davoli doŭhaja sustreča — doŭžyłasia hadzinu zamiest 40 chvilin. Buš pakazaŭ siabie vielmi ščyrym, adkrytym i maralnym palitykam. Kazaŭ, što jon hłyboka vierujučy čałaviek, i heta adna z pryčynaŭ, čamu jon u palitycy. Buš raspaviadaŭ bahata historyjaŭ pra svajo žyćcio. Navat nie daŭ nam skazać toje, što my padrychtavali. Zamiest hetaha jon pačaŭ vieści dyskusiju, dyjałoh. Biez sumniemu, heta palityk vielmi vysoha uzroŭniu.

Radyjo Racyja

Клас
0
Панылы сорам
0
Ха-ха
0
Ого
0
Сумна
0
Абуральна
0